अफगानिस्तानय् पाकिस्तान विरुद्ध प्रदर्शन

एजेन्सी- अफगानिस्तानया राजधानी काबुलय् मंगलवाः पाकिस्तान विरुद्ध प्रदर्शन जूगु दु । बिबिसीं बिउगु जानकारीकथं प्रदर्शनकारीतय्सं राष्ट्रपति भवनया न्ह्यःने नं प्रदर्शन यायेत स्वःगु खः । प्रदर्शनकारीतय्सं पाकिस्तान विरोधी नारा थ्वयेकेगु झ्वलय् ‘पाकिस्तानया कठपुतली सरकार मखु, स्वतन्त्र देश माः’ व ‘पाकिस्तान लिहां हुँ’ धयागु नारा थ्वयेकूगु खः ।

प्रदर्शनय् तालिबान विरोधी पुचः एनआरएफ जिन्दाबादया नारा नं थ्वयेकूगु खः । प्रदर्शनयात पनेत तालिबानं हवाइफायर याःगु खः । प्रदर्शनय् सलंसः मिस्त नं खनेदुगु खः ।

थुखे तालिबानं पञ्जशीरय् तालिबानया ध्वाँय् ब्वयेकूगु दु । तालिबानं सोमबाः थःपिनि लडाकुतय्सं ध्वाँय् ब्वयेकूगु भिडियो सार्वजनिक याःगु खः । एनआरएफं धाःसा रणनीतिक रुपं महत्वपूर्ण थासय् एनआरएफया हे कब्जा दुगु व युद्ध क्वमचाःनिगु धाःगु दु । एनआरएफया नेता अहमद मसुदं देय्न्यंक तालिबानविरुद्ध अभियान शुरु यायेगु धाःगु दु ।