ने. सं. ११४६ बछलागा चौथी -

मनपा मापदण्डय् अन्तरिम मवल

येँ – येँ महानगरपालिकां छेँया तल्ला थपे यायेगु बारे दयेकूगु न्हूगु मापदण्डया विरुद्ध उपत्यका विकास प्राधिकरणं तःगु रिटय् अन्तरिम आदेश जारी यायेम्वाःगु निर्देशन सर्वोच्च अदालतं बिउगु दु । येँ महानगरपालिकां येँ देय्या भित्री लागाय् च्वंपिं स्थानीय जनताया समस्यायात ध्यानय् तयाः आः भित्री लागाय् ७५ फिट तक तजाः यानाः छेँ दने दइ धकाः न्हूगु नियम हःगु खः । तर उपत्यका विकास प्राधिकरणं थ्व न्हूगु नियम प्राधिकरणं दयेकातःगु नियमावली लिसे मिले मजू धासें उकिया विरुद्ध सर्वोच्चय् रिट दायर याःगु खः ।

थ्व झ्वलय् जूगु सुनुवाईया झ्वलय् वंगु वालय् सर्वोच्चया न्यायाधीशपिं आनन्दमोहन भट्टराई व अनिल सिन्हाया मंकाः इजलाशं थुकी आःयात अन्तरिम आदेश जारी यायेम्वाः धकाः निर्देशन बिउगु खः । थुकिया बारे आः निगुलिं पक्षयात झिके यानाः सहलह लिपा जक निर्णय यायेगु खँ नं सर्वोच्चं धाःगु दु ।

येँ मनपाया भित्री शहर दुने थौंकन्हय् ३५ फिट अर्थात् प्यतँजाः जक यानाः छेँ दनेदु । तर शहरी लागाय् प्यतँजाः जक छेँ दनेबलय् थःपिंत प्रयाप्त मजुल धासें स्थानीय जनतां थ्व मापदण्डया उचाई थपे याना बी माल धकाः ताः ई न्ह्यवनिसें सः तया वयाच्वंगु खः । लिसें आपालं महानगरवासीतय्सं मनपाय स्वीकृति हे मयासे थःपिनि छेँ न्हय्तँजाः च्यातँजाः यानाः दना हे तयेधुंकूगु दु ।

थ्वहे झ्वलय् येँ मनपाय् निर्वाचित पदाधिकारीत वयेवं स्थानीय जनताया थ्व समस्या समाधान यायेत भित्री शहरय् दनेगु छेँया मापदण्ड संशोधन यासें आः ७५ फिट तक तजाः यानाः छेँ दने जिउ याना बिउगु खः । थुकियात येँ देय्या स्थानीय जनतां लसकुस याःगु दु ।
तर उपत्यका विकास प्राधिकरणया प्रमुख भाइकाजी तिवारीं थ्व न्हूगु मापदण्डं येँय् जनसंख्या अप्वइगु, भुखाय् ब्वइबलय् तःधंगु विपद् हइगु तर्क तसें मापदण्ड लित कायेत कामपायात निर्देशन बिउगु खः । तर कामपां स्थानीय सरकारया अवधारणा वयेधुंकाः निर्वाचित सरकारयात आदेश बीगु अधिकार प्राधिकरणयात मदु धासें अज्याःगु आदेश बीम्ह प्राधिकरण हे खारेज यायेमाः धकाः माग यानाच्वंगु दु । सर्वोच्चं आः बिउगु निर्देशनं प्राधिकरणयात छपलाः लिचिलेत बाध्य याना बिउगु दु ।