छवाःयंकं विश्व आदिवासी दिवस
येँ(नेपालभाषा टाइम्स)- थुगुसी विश्व आदिवासी जनजाति दिवस छवाःयंकं थीथी ज्याझ्वः यासें हनीगु जूगु दु । नेपाःया आदिवासी जनजातितय् संघसंस्थां मंकाःकथं छवाःतक थीथी ज्याझ्वः यानाः हनेगु निर्णय याःगु खः ।
नेपाल आदिवासी जनजाति महासंघया ज्याकुथिइ जूगु पत्रकार सम्मेलनय् थुगुसी ‘२८ क्वःगु विश्व आदिवासी जनजाति दिवस’ न्हापालिपा थें थीथी ज्याझ्वः यासें हनेगु जानकारी बिउगु दु । पत्रकार सम्मेलनय् महासंघया अध्यक्ष ग्याल्जेन शेर्पां विगतया दँय् थें थुगुसी नं महासंघया नेतृत्वय् नेपाःया आदिवासी जनजातितय् संघसंस्थां मंकाःकथं विश्व आदिवासी जनजाति दिवस हनेगु जानकारी बियादीगु ।
महासंघं उत्सवया रुपय् थीथी ज्याझ्वः यानाः दिवस हनेगु अध्यक्ष शेर्पां धयादीगु दु । वय्कलं नेपाःया आदिवासी जनजातितय्सं ताः ईतक आन्दोलन याःसां उपलब्धि प्राप्त मजूगु नापं अधिकारया सुनिश्चितता नं जुइ मफुगुलिं उत्सवया रुपय् अधिकार सुनिश्चितताय निंतिं दबाव बीगु ल्याखं छवाःयंकं थीथी ज्याझ्वः यायेगु जानकारी बियादीगु दु ।
साउन २४ गते दिवसया मूल समारोहया ज्याझ्वः प्रज्ञा प्रतिष्ठानय् याइगु जूगु दुसा उगु ज्याझ्वलय् मूपाहांकथं प्रधानमन्त्री शेरबहादुर देउवा झायादीगु जूगु दु । थ्व हे झ्वलय् आदिवासी दिवसया हे लसताय् लाकाः महासंघपाखें सम्बन्धन प्राप्त संघसंस्था व न्हय्गू आदिवासी जनजातितय् संस्थाया नेतृत्वय् थीथी ज्याझ्वः याइगु जूगु दु । पत्रकार सम्मेलनय् बिउगु जानकारीकथं साउन २० गते नेपाल आदिवासी जनजाति चलचित्र महासंघं पर्यटन बोर्डय् ‘आदिवासी जनजाति संकिपा क्यनेगु व विशेष सांस्कृतिक ज्याझ्वः याइगु जूगु दुसा साउन २१ गते आदिवासी जनजति महिला महासंघं ‘आदिवासी जनजाति ज्ञानया संरक्षण व पुुस्तान्तरणय् आदिवासी मिसातय् भूमिका’ विषयक अन्तक्र्रिया याइगु जूगु दु ।
साउन २१ गते हे नेपाल मगर संघं ‘मगरात सभ्यताय् पहिचानया आधार विषयक विचार गोष्ठी, साउन २२ गते किरात राई यायोक्खां ‘३५औं स्थापना दिवस व प्रदेश नं. १ किरात प्रदेश’ विषयय बहस, नेपाल आदिवासी जनजाति पत्रकार महासंघ (फोनिजं) विश्व आदिवासी दिवस व २३ क्वःगु स्थापना दिवसया सन्दर्भय् ‘आदिवासी जनजाति आन्दोलनष समीक्षा व आःया कार्यदिशा’ विषयय् अन्तक्र्रिया याइगु जूगु दु ।
थुकथं हे आदिवासी जनजाति युवा महासंघं साउन २८ गते ‘आदिवासी जनजातिया मुुद्धाय् आधारित नेतृत्व निर्माण’ विषय तालिम संचालन याइगु जूगु दुसा इन्डिजिनियस टेलिभिजनं छवाःयंकं हे आदिवासी जनजातिया सवालय् बहस ज्याझ्वः याइगु जूगु दु ।
थुगुसी वइगु अगष्ट ९ कुन्हु विश्व आदिवासी जनजाति दिवस लानाच्वंगु दुसा विश्वन्यंकंया आदिवासी जनजातितय्सं थीथी ज्याझ्वः यानाः थ्व दिवस हना वयाच्वंगु दु ।
LEAVE YOUR COMMENTS