
छिगु मू मू एजेन्डा छु छु खः ?
आः जुइगु स्थानीय चुनावया निंतिं जिं जिगु वडाया मुख्य एजेन्डाया रुपय् वडाया सुचुकुचुया निंतिं विशेष पहल यायेगु, त्वनेगु लः व धःया उचित व्यवस्थापन यायेगुयात प्राथमिकता बियागु दु । अथे हे सार्वजनिक पार्कया स्तरोन्नति यायेगु, वडा दुनेया सम्पदाया संरक्षणया निंतिं मर्मत, जिर्णोद्वार, पुनःनिर्माण व व्यवस्थापन यायेगु जुइ ।
थ्व बाहेकं एकीकृत वस्ती व मौलिक पहःया छेँ निर्माण याइपिंत ग्वाहालि यायेगु, ज्येष्ठ नागरिकया निंतिं स्वास्थ्य सेवा, ज्येष्ठ नागरिक मनोरञ्जन केन्द्रयात व्यवस्थित यायेगु, ज्येष्ठ नागरिकयात सहज रुपं भत्ता उपलब्ध याकेगु व वडावासीया स्वाथ्योपचारया निंतिं एम्बुलेन्सया व्यवस्था यायेगु नापं विशेष ज्याझ्वः हयेगु जुइ ।
लोकसेवाया निंतिं तयारी कक्षा संचालनलिसें सार्वजनिक थासय् निःशुल्क वाइफाइया व्यवस्था, उज्यालो वडाया निंतिं आवश्यक थासय् मतया व्यवस्था, गरिब वडावासीया निंतिं निःशुल्क शिक्षा व छात्रवृत्तिया निंतिं पहल यायेगु जुइ ।
छिगु वडाय् दुगु मुख्य समस्यात छु छु खः ?
१८ वडा दुनेया समस्यात ला यक्वं दु । अथे खःसां नं मुख्य समस्या धइगु दक्वं वडाय् खने दुगु समस्या हे खत । व समस्या धइगु त्वनेगु लःया व्यवस्थापन, बालं च्वंपिंसं याइगु फोहर व सुचुकुचु अले सहरी सुन्दरता हे कुरुप जुइकथं खने दयाच्वंगु केबुल, टेलिकम व विद्युतीय तारया व्यवस्थापन यायेमाःगु हे खत । आःया निर्वाचनय् जि त्यात धाःसा थ्व हे खँयात प्राथमिकता बियाः थ्व समस्या समाधान यायेगु कुतः याये ।
छि निर्वाचित जुयादी धइगु आधार छु दु ?
वंगु न्यादँया दुने वडावासीयात यानागु वा धाये बियागु सेवा, वडाया सम्पदा पुनःनिर्माण, पूर्वाधार विकासया नापं कोरोनां प्रभावित जुयाः लकडाउन जूगु इलय् यानागु अनेकथंया सेवा, सर्व सुलभ व व्यवस्थित रुपं कोरोना परीक्षण (पीसीआर टेस्ट), खोप बीकेगु, ज्येष्ठ नागरिक, ल्याय्म्ह, मिसापिनिगु निंतिं यानागु ज्या गुगु वडावासीं मूल्यांकन याःगु दु, उकिया हे लिधंसाय् त्याइगु आधार दु ।
निर्वाचित जुयादिल धाःसा दकलय् न्हापां छु यानादी ?
हाकनं जि वडाअध्यक्षय् निर्वाचित जुल धाःसा दकलय् न्हापां ला सकल मतदातातय्त वय्कःपिंसं जिं यानागु ज्याया मूल्यांकन यानाः जितः विश्वास यानाः मत बियाः त्याकादीगुलिं सुभाय् देछाये । ज्याया सन्दर्भय् च्वये धयाथें वडाया सुचुकुच यानाः महानगरया नमूना वडा दयेकेगु कुतः याये । अस्तव्यस्त जुयाच्वंगु तारया व्यवस्थापन व वडावासीया निंतिं लःया उचित व्यवस्थापन याये ।
वंगु न्यादँया कार्यकालप्रति छि गुलि सन्तुष्ट जुयादिया ?
वंगु न्यादँया कार्यकाल दुने जिं यानागु गुलि नं ज्या दु । उकी जि सन्तुष्ट हे दु । मेगु सामान्य इलय् स्वयां नं कोरोना संक्रमण व लकडाउन थाकुगु इलय् नं जिमिसं गुगु सेवा बियाः वडावासीया मन त्याके फत थ्व तःधंगु उपलब्धि खःसा थ्व हे जिमिगु सन्तुष्टि नं खः ।
स्थानीय भाषा, कला, संस्कृतिया उत्थानया निंतिं छिगु ग्वसाः छु दु ?
भाषाया सन्दर्भय् थ्व स्वयां न्ह्यःया कार्यकालय् स्थानीय भाषायात दक्वं ब्वनेकुथिइ लागू यानागुयात निरन्तरता बियाः उकियात तःचाः याना यंकेगु जुइ । अथे हे कला संस्कृतिया ख्यलय् नं वंगु न्यादँया अवधि दुने गुलि नं ज्या याना उकियात अझ धिसिलाक्क न्ह्यःने यंकेगु जुइ ।
LEAVE YOUR COMMENTS