सिवा सायमि खलःया बासुरी प्रशिक्षण क्वचाल
थिमि- सिवा सायमि खलः संस्कृति विभागया ग्वसालय् जूगु च्यालायंकंया बासुरी प्रशिक्षणया समापन वंगु विहीवाः जुल । बासुरी प्रशिक्षणया समापनलिसें बासुरी पिथनेगु ज्या नं जूगु खः ।
वंगु २०७६ मंसिर ९ गते (बालाचःह्रे)निसें शुरु जूगु बासुरी प्रशिक्षणया समापन धाःसा वंगु चैत २६ (चिल्लागा द्वादशि)कुन्हु जूगु खः । बासुरी प्रशिक्षण न्ह्यानाच्वँच्वं हे सरकारं कोभिड–१९या संक्रमणयात ध्यानय् तयाः जारी याःगु लकडाउनया कारणं प्रशिक्षणयात दथुइ हे दिकेमाःगु अवस्था वःगु खलकं जानकारी बिउगु दु ।
वंगु चैत ७ गते च्वंगु खलःया छगू मुँज्यां बासुरी प्रशिक्षण समापन लिसें पिथनेगु निर्णय याःगु खः । खलःया मुँज्याकथं बासुरी प्रशिक्षण समापनलिसें पिथनेगु झ्वलय् बासुरी प्रशिक्षण कयादीपिं सकसितं खलःपाखें सगं बीगु ज्या जूगु खः ।
खलःया दुजः मनोजलाल मानन्धरया संयोजनय् न्ह्याःगु बासुरी प्रशिक्षणय् मुक्कं ४२ म्हेसिनं प्रशिक्षण कयादीगु खःसा धनकाजी भासिमां बासुरी प्रशिक्षण चयन्द्र भासिमां वाद्यवादन प्रशिक्षण बियादीगु खसा बालमुकुन्द प्रजापति व दीपक वज्राचार्यं हुलाप्याखं प्रशिक्षण बियादीगु खः ।
बासुरी प्रशिक्षणया निंतिं मध्यपुर थिमि नगरपालिका व स्थानीय मानन्धर समुदायं आर्थिक व्यवस्थापन याःगु खःसा स्थानीय व्यवसायी पुष्पलाल मानन्धरं प्रशिक्षणया निंतिं थाय्या व्यवस्थापन यानादगिु खः ।
बासुरी प्रशिक्षण समापन ज्याझ्वलय् मध्यपुर थिमि नगरपालिकाया प्रमुख मदनसुुन्दर श्रेष्ठ, वडा नं. ४ व ६ या जनप्रतिनिधि, केन्द्रीय मानन्धर संघया सहायक सचिव उदेन न्हूसाय्मि, भक्तपुर जिल्ला मानन्धर युवा संघया पदाधिकारी, नेवाः पत्रकार राष्ट्रिय दबूया पदाधिकारीपिनिगु उपस्थिति दुगु खः ।
LEAVE YOUR COMMENTS