अफगानिस्तानी मिसा उद्धार उडानया झ्वलय् मचा बुइकल

एजेन्सी- तालिबानतय्सं काबुल नियन्त्रण कायेव उद्धारया निंतिं परिचालन जुयाच्वंगु अमेरिकाया छगू उडानया झ्वलय् छम्ह अफगानी मिसां मचा बुइकूगु दु । अमेरिकी सेनाया उगु विमान जर्मनीया आकाशय् ब्वयाच्वंगु इलय् मिसायात मचा बुइगु बेथा जूगु खः ।

मिसायात बेथा जुइवं विमानया कमान्डरं विमानय् हावाया चाप अप्वयेकेगु निंतिं जहाजया ब्वयाच्वंगु उचाइ म्हो याःगु खः । युएस एअर मोबिलिटीं आइतवाः ट्विटरय् पोस्ट याःगु ट्विटय् धयातःगु दु, ‘विमान ब्वयाच्वंगु उचाइ म्हो जुइवं उम्ह मिसायात स्थिर यायेफत, गुकिं मचा व मांया ज्यान बचे यायेफत ।’

ट्विटरय् थः परिवार लिसें मध्यपूर्व यात्रा यानाच्वंगु इलय् उम्ह मिसायात बेथा जूगु खँ धयातःगु दु । विमानयात जर्मनीया विमानस्थलय् अवतरण यायेवं अमेरिकी सैन्य चिकित्सकतय् पुचः विमानय् दुहां वनाः वयात मचा बुइकेत ग्वाहालि याःगु खः । मचा व मां निम्हेसियां अवस्था बांलाःगु व उमित लिक्कसं लाःगु अस्पतालय् यंकूगु खँ धाःगु दु ।