ने. सं. ११४४ कौलाथ्व पारू - नःलास्वनेगु

अमेरिकाय् शताब्दीया हे दकलय् तःधंक जंगलय् मि च्यात

एजेन्सी- अमेरिकाय् शताब्दीया हे दकलय् तःधंगु कथं जंगलय् मि नयाच्वंगु दु । मिं नयाः अमेरिकाया हवाइ राज्यय् लाःगु ऐतिहासिक सहर लाहैना ध्वस्त जूगु दु्सा ९३ म्ह मनूतय् ज्यान वनेधुंकूगु दु । सीपिनि ल्याः अझं अप्वयेफु धाःगु दु । मिं बचे जुइगु निंतिं बिसिउँ वंपिं तःम्ह मनूत अझं तनाच्वंगु खँ धाःगु दु । बचे जुया वःपिंत आः माउइ च्वंगु आश्रयस्थलय् तयातःगु दु ।

हवाइ राज्यया गभर्नर जोस ग्रीनं थ्व तसकं कठीन ई जूगु खँ धाःगु दु । वय्कलं धाःगु दु, ‘थ्व हवाईं भोगे यायेमाःगु आःतकया हे दकलय् विध्वंसकारी प्राकृतिक वि पद् खः । ‘आः जिमिसं म्वानाच्वंपिंत जक सहयोग यायेफु । आः जि मिगु ध्यान तनाच्वंपिंत पुनर्मिलन याकेगु, उमित आवास व स्वास्थ्य सेवा बीगु व थ्व धुंकाः पुनर्निर्माणय् केन्द्रीत जुइ’ गभर्नर ग्रीनं धाःगु दु ।

यक्व मनूतसें जंगलय् मि च्याःगु बारे पूर्वजानकारी मबिउगु खँ धाःगु दु । थ्व मि च्याःगु बारे जानकारी बीत पूर्व चेतावनी प्रणाली छ्यःगु दु कि मदु वा उकी छुं समस्या जुयाच्वंगु खः धयागु बारे धाःसा स्पष्ट मजूनि ।

हवाईया छम्ह जनप्रतिनिधि जिल टोकुडां बिबिसीलिसे खँ ल्हासें थ्व घटनां गम्भीर न्ह्यसःत ब्वलंगु धासें थुकिया सम्बोधन याये आवश्यक दु धाःगु दु । ‘थःगु लाहैना भ्रमण तसकं ‘हृदयविदारक’ जूगु धासें टोकुडां धाःगु दु ‘थ्व अवस्थाय् सकसितं तं वइगु कारण दु, अले थुकिया लिसः बीमाः ।’

शनिवाःनिसें जंगलय् मि नःगु खःसा सोमवाःतकया दुने यक्व हे मि नियन्त्रणय् वयेधुंकूगु खँ धाःगु दु । अय्सां ध्वस्त जूगु लाहैना लिसें थ्वया जःखःच्वंगु टापुया छुं ब्वय् पूवंक मि स्यायेगु कुतः जुयाच्वंगु दु । अधिकारीतय्सं टापुया तटीय क्षेत्रय् मालेज्या तच्वयेकूगु दु । वि शेष यानाः भग्वनावशेष तःलय् सीम्ह दयेफुगुलिं प्रशिक्षित खिचा हयाः मालेज्या न्ह्याकाच्वंगु दु ।

माउइया प्रहरी प्रमुख जोन पेलेटिअरं थःपिंसं आःतक गुलि क्षति जुल धयागु धायेमफुनिगु खँ धाःगु दु । थन अझं द्वःछिम्ह मनू तनाच्वंगु खँ उद्धारकर्मीतय्सं धाःगु दु । उपिं मध्ये अप्वः सुरक्षित हे दयेमाःगु तर संचार स्वयां तापाक लाःगुलिं स्वापू तयेमफयाच्वंगु खयेमाः धाःगु दु ।

मिं नयाः निद्वलं मल्याक भवन ध्वस्त जूगु अनुमान दु । थुपिं मध्ये अप्वः धयाथें लाहैना क्षेत्रया हे लाः । लाहैना तक थ्यंकेगु सतक नं गनं आंशिक गनं पूवंक क्षति जूगु दु । मनूत थनं पिहां वने दइला धकाः राजमार्गय् झ्वःछुनाच्वंगु दु । वैकल्पिक राजमार्ग चायेकूसां स्थानीयतय्सं अनं गाडी यंकेगु जोखिमपूर्ण जुइगु खँ धयाच्वंगु दु । आवतजावत ठप्प जूगुलिं नं पीडितत तंम्वयाच्वंगु दु ।

अथेहे उद्धार ज्याय् खटे जूपिं पाइलटतय्सं धाःकथं बन्दरगाहय् दिकातःगु फुक्क धयाथें डुंगा नं च्यानाः डुबे जूगु दु । थनया ऐतिहासिक भवन, चर्च, मिसनरी भवन फुक्कं फुक्कं धयाथें ध्वस्त जूगु खँ उमिसं धाःगु दु ।

थन वःगु ग्वःफय् व सुख्खा मौसमया कारणं मि याकनं न्यनावंगु अनुमान दु । माउइ टापुलिसें हवाईया यक्व ब्वय् वा मवयाः सुख्खा जुयाच्वंगुलिं नं यक्व क्षति जूगु खः ।