सांसदतय्त कारवाही यायेगु खँय् सभामुख दबाबय्

येँ- नेकपा एमालें झिंप्यम्ह सांसदपिंत सांसद पदं निष्काशन यायेगु नितिं संसद सचिवालयय् च्वःगु पौयात कयाः सभामुख अग्निप्रसाद सापकोटां छवाः दयेधुंकाः नं छुं निर्णय मयाःगुलिं विवाद ब्वलनाच्वंगु दु । सभामुख सापकोटायात थुकियात कयाः निखेरं दबाब नं लानाच्वंगु दु ।

एमालें थःपिंसं कारवाही यानापिं सांसदतय्त याकनं पद मुक्त यायेमाः धकाः दबाब बियाच्वंगु दुसा मेखे कारवाहीलय् लाःपिं सांसदतय्सं धाःसा थःपिंत याःगु कारवाही हे प्रक्रियागत रुपं मिले मजू धासें कारवाही यायेदइमखु धकाः सभामुखयात पौ बिउगु दु । थुकिं यानाः सभामुख सापकोटां तच्वःगु दबाबय् लानाच्वंगु दु ।

थःपिंत पदं चीके दइमखु धकाः दावी याःपिं सांसदतय्सं थःपिंसं पार्टीया ह्वीप उल्लंघन मयानाः धासें थःपिंत याःगु कारबाही हे गैरकानुनी जूगु दावी यानाच्वंगु दु । सांसदतय्सं जेठ २३ गते एमाले अध्यक्षं जारी याःगु पतिइ पार्टी नेतापिंत व स्वयां न्ह्यः जूगु गल्ती कमजोरीयात कयाः गुगुं नं कथंया कारबाही मयायेगु धायेधुंकाः वैशाखय् मत मबिउगु विषयय् कारबाही यायेगु उचित मजूगु दावी याःगु दु ।

वंगु वैशाख २७ गते तत्कालीन प्रधानमन्त्री केपी शर्मा ओलीयात विश्वासया मत मबिसे पार्टी अनुशासन उल्लंघन याःगु धासें उमित चीकेत एमालें सभामुखयात पौ च्वःगु खः । एमालें झिंप्यम्ह सांसदया पद तत्काल रिक्त याकेगु निंतिं वंगु छुं न्हिं न्ह्यः सभामुख नापलाःगु खःसा वयां लिपा नं सांसद पद रिक्त मयायेवं सभामुखयाच्याम्बरय् एमालेया सांसदपिसं धर्ना बिउगु खः ।

राजनीतिक दल सम्बन्धी ऐन कथं राजनीतिक दलं निष्काशन याःपिं संघीय संसदया पद रिक्त जूगु खँ दलं उमित निष्काशन याःगु बारे सभामुखयात जानकारी बिइमाःगु व सभामुखं पद रिक्त जूगु सुचं संसदय् न्यंकेगु व सचिवालयय् टाँस यायेमाःगु खँ न्ह्यथनातःगु दु ।

एमालें ऐन कथं पार्टीं सभामुखयात सुं सांसदयात कारवाहीया निंतिं पौ छ्वयेधुंकाः सभामुखयाके छानविन यानाच्वनेगु अधिकार मदु, पार्टीया पौ कथं कारवाही न्ह्याकेमाः धकाः दबाब बियाच्वंगु दु ।

एमालेया पौयात कयाः सभामुखं धाःसा कानुनी रुपं सहलह यानाच्वंगु खँ सीदुगु दु । एमालें कारबाही याःपिं सांसदपिं न्हूगु नेकपा एकीकृत समाजवादी पार्टीइ दुहां वनेधुंकूगुलिं यानाः नं उमित कारबाही यायेगु कानुनी आधार छु जुइ धइगु बारे नं सभामुखं कानुनविद्पिनिगु राय कायेगु ज्या यानाच्वंगु खँ सीदुगु दु ।

सम्बन्धित बुखँ

LEAVE YOUR COMMENTS