स्थानीय तहय् वातावरण प्रदूषण अप्वल

यल – स्थानीय तहय् निर्वाचित जनप्रतिनिधि वयेधुंकाः गुलि ज्या जुइमाःगु खः उलि सन्तोषजनक रुपं जुइ फयाच्वंगु मदु । थुकिया लिपांगु छगू उदाहरण खः यल महानगर लागाया प्रदूषण । स्थानीय तहय् निर्वाचित जनप्रतिनिधि वयेधुंकाः महानगर लागाय् प्रदूषण सम्बन्धी मुद्दा नं अप्वःगु दु ।

स्थानीय तहय् दुगु न्यायिक समितिइ उद्योग कलकारखानापाखें वातावरण प्रदूषण अप्वःगु मुद्दा वयाच्वंगु यल महानगरपालिका वातावरण विभागं न्ह्यथंगु दु । विभागया उपनिर्देशक सफला श्रेष्ठया कथं थःपिंथाय् वःगु उजुरीया अध्ययन यानाः उकिया हे लिधंसाय् प्रतिवदेन बीगु तयारी जुयाच्वंगु दु ।

स्थानीय तहय् न्हापा लिपा स्वयां थुगुसी वातावरण प्रदूषणया मुद्दा अप्वया वनाच्वंगु दु । विभागं दोषीयात बयानया निंतिं सःतेगु व सुधारया निंतिं ई बीगु यानाच्वंगु दु । उद्योग कलकारखाना संचालनया निंतिं स्वीकृति बीगु इलय् हे वातावरण प्रदूषण म्हो यायेगु नाप उकिया निंतिं अवलम्बन याये फइगु विधि न्ह्यथनेमाःगु नियम दु ।

तर अप्वःथें उद्योगं वातावरण प्रदूषणया निंतिं नालेमाःगु विधि अवलम्बन मयाःगु जक मखसे सावधानीया उपाय तकं नाला कायेगु ज्या यानामच्वंगु विभागया अनुगमनं क्यंगु दु । स्थानीयवासीत थः हे नं सतर्क व सजग जूसा जक वातावरण प्रदूषण म्हो याये फइगु विभागया धापू दु । प्रदूषण अप्वयेकीगु गुलिखे उद्योग अनुगमन व कारवाही लिपा सुधार जुया वःगु विभागं न्ह्यथंगु दु ।

गुलिखे उद्योग दर्ता छगू थासय् यानाः मेगु हे थासय् यंकाः संचालन यायेगु यानाच्वंगुलिं अनुगमन याये मफयाच्वंगु धासें उजुरी वःगु आधारय् हे थःपिंसं कारवाही याये फइगु विभागया धापू दु ।

स्थानीय सरकार शासन ऐनया लिधंसाय् स्थानीय निकायय् गठन यानातःगु न्यायिक समितिइ स्थानीयस्तरय् जूगु व जुयाच्वंगु विवादयात समाधान याना वयाच्वंगु दु । अज्याःगु विवाद, समस्या वा मुद्दायात फत्तले नगर उपप्रमुख व गाउँपालिकाया उपाध्यक्षं हे मिले यायेगु याना वयाच्वंगु दु । समितिं मिले याये फुगु विवाद जक अदालत वनीगु खः ।