अनधिकृत भिडियो खिचे यानाः चरित्र हत्या याःपिं युट्युबर ज्वन

येँ- थःत थःथम्हं पत्रकार धयाजुइपिं युट्युबर व टिकटकरतय्सं छुं नं घटनायात अतिरंजित यानाः मनूतय् व्यक्तिगत जीवनयात विवादय् हयेगु लिसें चरित्र हत्या यायेगु ज्या जुया वयाच्वंगु दु । झापाया विर्तामोडय् थज्याःगु हे छगू घटना जूगु दु । छगू रेष्टुराँय् नः वयाच्वंपिं छम्ह मिजं व निम्ह मिसातय् भिडियो खिचे यानाः अनैतिक ज्या यानाच्वंपिं धकाः टिकटकय् तयाबिउगु दु । थथे अनधिकृत रुपं भिडियो खिचे यानाः चरित्र हत्या याःगु द्वपनय् निम्ह युट्युबर व निम्ह टिकटकरयात प्रहरीं ज्वंगु दु ।

प्रहरीं खगेन्द्र घिमिरे, हेमराज भट्टराई, सुवास कार्की व मेम्ह छम्हेसित ज्वनेधुंकूगु दुसा भिडियो खिचे याःपिं मेपिं युट्युबरतय्त नं मालाच्वंगु खँ धाःगु दु ।

रेष्टुराँय् नयाच्वंपिं मिजं व मिस्तय् अनधिकृत रुपं भिडियो खिचे यानाः सामाजिक सञ्जालपाखें चरित्र हत्या याःगु धयागु उजुरी लाःगुलिं उमित ज्वनाः कुनागु खँ इलाका प्रहरी कार्यालय अनारमनि झापाया प्रमुख डिएसपी सन्तोष आचार्य धयादीगु दु ।

थुगु भिडियोया कारणं थःपिनिगु जीवन बर्बाद यानाबिउगु धासें मिस्तय्सं होटल थुवाः लिसें वयाः प्रहरीइ उजुरी बिउगु खः । युट्युबरतय्सं होटलया रेष्टुराँय् नयाच्वंपिं छम्ह मिजं व निम्ह मिस्तय्त म्वाःमदुगु न्ह्यसः तयाः भिडियो खिचे याःगु खः । उजुरी बिउपिंसं थःपिंसं छुं नं कथंया अनैतिक ज्या मयानागु धासें थःपिनिगुचरित्र हत्या याःगु,गोपतीयता हना याःगु व समाजय् बेइज्जती याःगु धासें उजुरी बिउगु खः ।

पीडित मिस्तय्सं जू हे मजूगु घटनायात अतिरञ्जित यानाः प्रचार प्रसार यानाः थःपिनिगु जीवन बर्बाद याःगु खँ धाःगु दु । पीडित मिस्त छुं हे मयायेकं थःपिनिगु बेइज्जत यानाबिउगु धासें मानसिक तनावय्ल ानाच्वंगु खँ धाःगु दु । युट्युबरतय्सं अनैतिक ज्या यानाच्वन धाःपिं मिस्त मध्ये छम्ह अपाङ्ग जूगु खँ प्रहरीं धाःगु दु ।

सम्बन्धित बुखँ

LEAVE YOUR COMMENTS