मल्ल के. सुन्दरयात पद्मरत्न मानवअधिकार सम्मान लःल्हात

येँ(नेपालभाषा टाइम्स)- वरिष्ठ मानवअधिकारवादी नेतालिसें नेवाः न्ह्यलुवा पद्मरत्न तुलाधरया लुमन्तिइ नीस्वनातःगु ‘पद्मरत्न मानवअधिकार सम्मान’ मेम्ह मानवअधिकारवादी नेता लिसें नेवाः न्ह्यलुवा मल्ल के. सुन्दरयात लःल्हाःगु दु ।

उपराष्ट्रपति नन्दबहादुर पुनं उगु सम्मान लःल्हानादीगु खः । विश्व मानवअधिकार दिवसया लसताय् ग्वसाः ग्वःगु १४ क्वःगु राष्ट्रय मानवअधिकार महाभेला –२०७९ ज्याझ्वलय् न्यय्द्वः तका दांया उगु सिरपाः वय्कःयात लःल्हाःगु खः ।

मदुम्ह तुलाधरया लुमन्तिइ वय्कःया छेँजःपिंसं स्वनादीगु थुगु सिरपाः थ्व स्वयां न्ह्यः डा. मथुराकृष्ण श्रेष्ठ, दमननाथ ढुंगाना र डा. रेणु अधिकारीयात लःल्हायेधुंकूगु दु ।
अथे हे महाभेलाय् सिरहाया मिसा मानवअधिकारवादी नेतृ देवकुमारी महरा व डा. गणेश गुरुङयात नं थीथी मानवअधिकार सिरपाः लःल्हाःगु खः ।

विश्व मानवअधिकार दिवसया लसताय् नेपाःया थीथी मानवअधिकारवादी संघसंस्थां बिस्कं बिस्कं थीथी ज्याझ्वः यानाः हना वयाच्वंगुलिइ थनिं गुदँ न्ह्यनिसें दक्वं संघसंस्था छगू हे थासय् मुनाः महाभेलाया ग्वसाः ग्वयाः हना वयाच्वंगु दु ।

नेपालभाषा टाइम्स

च्वमिया मेमेगु

• नेवाः हाइकु ख्यः न्हय्‌क्वःगु बुसादँ हना
• महाकवि सिद्धिदासया बुन्हिया लसताय् चिनाखँ व किपा च्वज्या कासा
• एनओएया रजत जयन्ती व न्हूधाः
• सामाजिक संजालं लुइकल स्वंगू दशक न्ह्यः तंगु मूर्ति
• परियत्तिया आधिकारिक वेबसाइट संचालन