सांसद कोष विवादय्

कार्यक्रम खारेज यायेमाःगु विज्ञतय् सुझाव
येँ – निर्वाचन क्षेत्र विकास ज्याझ्वःयात निरन्तरता बीगु कि मबीगु धइगु बारे विवाद ब्वलंगु दु । अप्वः धइथें राजनीतिक पार्टीया सांसदतय्सं थुगु ज्याझ्वःयात निरन्तरता बीमाः धइगु तर्क तसें सांसदतय्सं खर्च याये दइगु उगु ध्यबाया रकम समेत अप्वयेकेमाः धकाः तकं सरकारयात दबाब बियाच्वंगु दु । तर सुशासनया जानकारपिंसं धाःसा थज्याःगु ज्याझ्वःया औचित्य हे मदुगुलिं उकिया रकम अप्वयेकेगु मखु बरु ज्याझ्वः हे खारेज यायेमाःगु खँ धायेगु याना हःगु दु ।

निर्वाचन क्षेत्र विकास कार्यक्रम बारे अध्ययन याःगुपिं गुलिखे एनजीओ व आइएनजीओतय्सं थःपिनि अनुसन्धानया रिपोर्टय् थ्व कार्यक्रम बारे नकारात्मक खँ च्वयातःगु खँ सीदुगु दु । सुशासन महासंघ नेपालं तयार याःगु छगू ‘निर्वाचन क्षेत्र विकास कार्यक्रम छगू विश्लेषणात्मक अध्ययन’ य् सांसद विकास कोषं याःगु खर्चपाखें बांलाःगु लिच्वः मवःगु धासें थुकियात खारेज यायेमाःगु सुझाव बियातःगु दु ।

प्रतिवेदनय् निर्वाचन क्षेत्र विकास कार्यक्रमयात चिठ्ठाया रुपय् कयाः कार्यकर्ता व मतदाता अप्वयेकेगु ज्या जक जूगुलिं उगु ज्या खारेज यायेमाःगु सुझाव बियातःगु खः। सांसदं विधायकया भूमिकाया लिसें कार्यकारीया रुपय् ज्या याःगुलिं प्रत्यक्ष रुपय् संलग्न जुइगु स्वयां अभिभावकया रुपय् भूमिका म्हितेमाःगु सुझाव नं उकी बियातःगु दु ।

निर्वाचन क्षेत्र विकास खर्च सांसदया भोट बैंकया राजनीति, आयोजना तर्जुमा व कार्यान्वयनय् राजनीतिक प्रभाव व जिविसय् प्राविधिक मानव संशाधनया कमीं यानाः ज्याझ्वः निष्पक्ष, समान व प्रभावकारी मजूगुलिं नं उकियात खारेज यायेमाःगु खँ वःगु खः । तर थीथी राजनीतिक पार्टीया सांदसतय्सं धाःसा सांसदतय्सं खर्च याये दइगु थ्व कार्यक्रमया बजेट अप्वयेकाः आः १० करोड थ्यंकेमाः धकाः दबाब बीगु लिसें उकिया लागिं लबिङ समेत यानाच्वंगु दु ।

सम्बन्धित बुखँ

LEAVE YOUR COMMENTS