राजधानी काभ्रेय् तयेत माग

येँ – नेवाः–ताम्सालिङ समितिपाखें म्हिगः ग्वसाः ग्वःगु बुद्धिजीवी भेलां ३ नम्बर प्रदेशया राजधानी काभ्रे जिल्लाय् हये माःगु माग याःगु दु । थौंकन्हय् हेटौंडाय् तयातःगु प्रदेशया राजधानी यक्वसिया लागिं पायक मजूगु खँ वयाच्वंगु व काभ्रे धइगु नेवाः व तामाङ जातिया मंकाः थाय् थें जूगुलिं अन हे प्रदेशया राजधानी तये माःगु माग भेलां याःगु खः ।अथे हे थ्व नम्बर प्रदेशया नां ‘नेवाः–ताम्सालिङ’ प्रदेश तयेमाः धकाः नं भेलां माग याःगु दु । प्रदेशया नां नेवाः–ताम्सालिङ जुइमाः धकाः थ्व समितिपाखें ताः ई न्ह्यवंनिसें माग याना वयाच्वंगु खः ।भेलां प्रदेशया नां पहिचानविहिन जुइक तयेगु लागिं बागमती, नारायणी, पशुपति आदि आदि नां नं न्ह्यःने वयाच्वंगुलिं उकियात अस्वीकार यासें नेवाः ताम्सालिङ हे तयेकेगु लागिं पहल यायेगु निर्णय नं याःगु दु ।

उकथं हे प्रदेशय् छ्यलीगु सरकारी भाय् नेवाः व तामाङ भाय् जुइमाः धकाः नं माग याःगु दु । समितिं प्रदेशया सरकारी भाय् थ्व निगू नं जुइमाः ताःई न्ह्यवंनिसें माग ना वयाच्वंगु खः ।थ्व मागयात न्ह्यःने यंकेगु लागिं आः समितिं प्रदेशया ११० म्हं हे सांसदतलिसे अन्तक्र्रिया यायेगु निर्णय नं याःगु दु । सांसदतय्त थुकिया बारे ध्वाथुइका वनेगु ग्वसाः कथं थ्व ज्याझ्वः यायेत्यंगु खः । ३ नम्बर प्रदेशया प्रदेशसभा थौंकन्हय् राजधानी हेटौंडाय् सञ्चालन जुयाच्वंगु दु ।म्हिगः जूगु बुद्धिजीवी भेलाय् नेवाः बुद्धिजीवीपिं मल्ल के. सुन्दर, नरेश ताम्रकार, राजभाई जकःमि लिसें तामाङ बुद्धिजीवीपिं सिताराम तामाङ, परशुराम तामाङ आदिपिनिगु नं उपस्थिति दुगु खः ।