नेपाः पार्टी व ज्यापु महागुथिपाखें विरोध

येँ – भारतं आः सार्वजनिक याःगु न्हूगु नक्साय् नेपाःया भूभाग समेत थःगु भूमिइ लाकातःगु खँयात नेपाः राष्ट्रिय पार्टीं विरोध याःगु दु । पार्टीया नायः डा. विजय सैंजुं छगू वक्तव्य जारी यासें भारतीय नक्साय् नेपाःया भूमि समेत थःगु देशय् लाकूगु खँय् नेपाः सरकारं तत्काल हे पलाः ल्ह्वनाः भिंकेगु ज्या यायेमाः धयातःगु दु ।

लिसें थ्व ज्यायात भारतया विस्तारवादी रवैया खः धकाः नं विरोध यानातःगु दु । उकथं हे लिम्पियाधुरा, लिपुलेक व कालापानीइ भारतं जबरजस्ती सेना तयेगु व इलय् ब्यलय् सिमाना अतिक्रमण यायेगु थेंज्याःगु हस्तक्षेपकारी ज्या यानाच्वन धासें ज्यापु महागुथिं नं विरोध याःगु दु ।

जःलाखःला देय्या भूभाग अतिक्रमण याये मदइगु अन्तर्राष्ट्रिय कानुन व मान्यता अःखः भारतं थःगु राजनैतिक नक्साय् नेपाःया भूभागयात दुथ्याकूगु धासें ज्यापु महागुथिं विरोध प्रकट याःगु खः ।

महागुथिया नायः राजभाई जकःमिं छगू विज्ञप्ति जारी यासें भारतया थज्याःगु हस्तक्षेपकारी व मिचाहा भूमिकां तच्वःगु घाः लाकूगु धासें भारत सरकारया उगु नक्सायात याकनं भिंकेत माग यानातःगु दु । लिसें विज्ञप्तिइ कालापानीइ च्वनाच्वंपिं भारतीय सेनायात अनं चीकेत नं माग यानातःगु दु ।

सम्बन्धित बुखँ

LEAVE YOUR COMMENTS