८९ दँया वैंशय् दाफा म्येँ मुना
येँ- उमेरं गुंगू दशक थ्यनेधुंकूम्ह गुह्येश्वरीराज मानन्धरया सलय् दाफा म्येँ मुना पिहां वःगु दु । दाफा बाजं व दाफा संस्कृति लोप जुया वनीगु अवस्थाय् थ्यनाच्वंगु इलय् थुकिया संरक्षण यायेगु तातुनाः मानन्धरं थःगु सलय् ऐतिहासिक परम्परागत नेपालभाषाया म्येँ ‘दाफा म्येँ मुना’ पिथनादीगु खः । दाफा संस्कृतिपाखें न्हू पुस्ता तापाना वनाच्वंगु इलय् थुकियात ल्यंका तयेगु व प्रवद्र्धन यायेगु तातुनाः मानन्धरं ८९ दँया उमेरय् थःगु याकः सलय् उगु म्येँ मुना पिथनादीगु खः ।
वंगु शनिवाः जनकवि दुर्गालाल श्रेष्ठया सभापतित्वय् जूगु ज्याझ्वलय् वय्कःलिसें मूपाहां वाङ्मय शताब्दीपुरुष सत्यमोहन जोशी, विशेष पाहां नेपालभाषा परिषद्या पुलांम्ह नायः, साहित्यकारलिसें बौद्ध विद्वान फणिन्द्ररत्न वज्राचार्य, मेम्ह विशेष पाहां धर्मोदयसभाया अध्यक्षनापं बौद्ध विद्वान यज्ञमानपति वज्राचार्यं मंकाःकथं उगु दाफा म्येँ सार्वजनिक यानादीगु खः ।
प्रा. डा. सिलु मानन्धर वज्राचार्यं लसकुस यासें न्ह्याःगु ज्याझ्वलय् न्हूकथं म्येँ सार्वजनिक यायेगु ज्या जूगु खः ।
आतक जुया वयाच्वंगु स्वयां बिस्कं धंगं दाफा म्येँ मुनाया कभर ब्वज्या यानाः म्येँ सार्वजनिक याःगु ज्याझ्वलय् ज्याथम्ह म्येँ हालामि मानन्धरं हालादीगु बसन्त रागया ‘श्यामसुन्दर वसन्त बेलस …..’ म्येँया म्युजिक भिडियो नं सार्वजनिक याःगु खः ।
म्येँ हालामि मानन्धरं मूपाहां जोशीयात दोसल्ला न्ययेकाः हनेज्या यानादीगु ज्याझ्वलय् मूपाहांपाखें थीथी त्वाः गुथि खलःया दाफा म्येँया गुरुपिंत दोसल्ला न्ययेका हनेज्या यानादीगु खः ।
ज्याझ्वलय् मूपाहां, पाहांपिंसं दाफा म्येँया उपादेयताया बारे थःथःगु नुगःखँ कनादीगु खःसा म्युजिक भिडियोया कलाकार, प्राविधिकपिंत मतिनाया चिं नं लःल्हाःगु खः । ज्याझ्वलय् प्रा. डा. पुष्कर वज्राचार्यं सुभाय् देछानादीगु खः ।
८–१० दँ दुबलय्निसें तवालय् दाफा म्येँ हालेगु याना वयाच्वनादीम्ह मानन्धरं थौंतकं उकिया रियाज यायेकथं म्येँ हालेगु याना वयाच्वनादीगु दुसा वय्कलं ८८ दँ उमेरय् दाफा म्येँ रिकर्ड यानाः थःगु ८९ दँया बुन्हिकुन्हु लाकाः म्येँ सार्वजनिक यानादीगु खः ।
दाफा म्येँ म्येँचाःया रुपय् पिमथँसे यु ट्युबय् न्यने फइकथं सार्वजनिक याःगु खःसा दाफा म्येँया संगीत संयोजन हरिशरण साय्मिं यानादीगु खः ।
LEAVE YOUR COMMENTS