प्रहरी हिरासतय् ल्याय्म्ह सीवं ब्रसेल्सय् प्रदर्शन

एजेन्सी – प्रहरी हिरासतय् छम्ह २३ दँया ल्याय्म्ह सीवं बेल्जियमया राजधानी ब्रसेल्सय् सलंसः मनूत सतकय् कुहां वयाः हिंसात्मक प्रदर्शन याःगु दु। थ्व हुलदंगाया झ्वलय् प्रदर्शनकारीतय्सं बेल्जियमया जुजु फिलिपया गाडी मिप्वालं कयेकूगु दु। हुलदंगा जुयाच्वंगु थासय् कयातःगु छगू भिडियोय् जुजुया गाडीइ मिप्वालं कयेकूगु खनेदुगु खः । उगु गाडी ब्रसेल्सं राजदरवारपाखे लिहां वनाच्वंगु खः । प्रदर्शनकारीतय्सं छगू प्रहरी ज्याकुथि नं मि च्याकाबिउगु दुसा सतकय् नं तोडफपोड याःगु दु । शनिवाः सनिलय् कोरोना नियन्त्रणया निंतिं लागु यानातःगु प्रतिबन्ध उल्लंघन याःगु आशंकाय् उम्ह ल्याय्म्हयात ज्वंगु खः ।