ट्रम्प विरुद्धमहाभियोग तये फइगु द्वपं

येँ – अमेरिकी राष्ट्रपति डोनाल्ड ट्रम्पं युक्रेनया राष्ट्रपतिलिसे फोनय् यानादीगु छगू खँल्हाबल्हा ट्रम्प विरुद्ध महाभियोग तयेगु आधार जुइफइगु खँ धयाहःगु दु । अमेरिकी संसदया छगू शक्तिशाली समितियाअध्यक्षं थ्वदावीयाःगु खः । हाउस अफ रिप्रिजेन्टटिभया गुप्तचरी सम्बन्धी समितिया नेतृत्व यानादीम्ह एडम शिफं सीएनएनलिसे खँल्हासें थ्व दावी यानादीगु खः ।

शिफं कनादी कथं राष्ट्रपति ट्रम्पं उगु फोन वार्ताय् थःगु देशया विपक्षी नेतातय्गु आलोचना या धकाः युक्रेनी राष्ट्रपतियात धाःगु खः । शिफया कथं यदि राष्ट्रपति ट्रम्पं विपक्षी नेतातय्त ध्याचः छ्वाकि धकाःविदेशी नेतातय्त दबाब बीगु कुतः याःगु खत धाःसा वय्कःया विरुद्ध महाभियोग लाइगु अवश्यम्भावी दु ।

शिफं राष्ट्रपति ट्रम्प व युक्रेनी राष्ट्रपति भोलोदिमिर जेलेन्स्की दथुइ जूगु फोन वार्ता सार्वजनिक यायेत नं दबाब बियाच्वंगु दु । तर ह्वाइट हाउसं थुकियात टेरे यानाच्वंगु धाःसा मदुनि । ट्रम्पं थः विरुद्ध राजनीतिक उद्देश्यं प्रेरित जुयाः थ्व द्वपं बियाच्वंगु दावी यानादीगु दु ।

अमेरिकाया पुलांम्ह राष्ट्रपति बाराक ओबामाया पालय् उपराष्ट्रपति जुयादीम्ह जो बाइडनया कायं युक्रेनय् चायेकातःगु छगू कम्पनी विरुद्ध जुयाच्वंगु छानबिनया सन्दर्भय् राष्ट्रपति ट्रम्पं युक्रेनी राष्ट्रपतिलिसे खँल्हाःगु द्वपं लानाच्वंगु दु । ट्रम्पं बाइडनया काय सम्बन्धी उगु प्रकरणया छानबिन यायेमाः धकाः माग याना वयाच्वंगु दु ।