मिसा शिक्षाय् तालिबानया न्हूगु नियम हल

येँ – मिसा शिक्षायात कयाः न्हूगु नियम हःगु दु । अफगानिस्तानया विश्वविद्यालयय् आः मिसा व मिजं छथासं च्वनाः ब्वने मदइगु जूगु दु । अफगानिस्तानया उच्च शिक्षा सम्बन्धी मन्त्री अब्दुल बाकी हक्कानीं मिस्तय्सं नं ब्वने खनीगु जूसां मिसा व मिजंतय्त अलग अलग क्वथाय् तयाः ब्वंकेगु धाःगु दु । अथे हे छु छु विषय ब्वकेगु धइगु खँय् पुनरावलोकन जुइगु व आखः ब्वं वइपिं विद्यार्थीतय्त इस्लामिक डे«सं पुनेमाःगु नं मन्त्री अब्दुलं धाःगु दु ।

मिस्तय्सं म्ह छम्ह त्वपुइगु ‘हिजाब’ फिइमाः । मन्त्री अब्दुलां मिस्त शिक्षा व रोजगारं बञ्चित मजुइगु नं धाःगु दु । मन्त्री अब्दुलं तालिबानं वाजिब व इस्लामिक पाठ्यक्रम दयेकीगु व पाठयक्रम इस्लामी, राष्ट्रिय व ऐतिहासिक जुइगु नं धाःगु दु । अफगानिस्तानया जनतां थ्व नियम स्वीकार याइगु नं मन्त्री धाःगु दु । सन् १९९६ निसें २००१ तक तालिबानं शासन याःबलय् मिस्तय्त शिक्षा व रोजगारय् प्रतिबन्ध तयातःगु खः ।

तालिबानया थ्व नीतिं यानाः मिस्तय्सं आखः ब्वनेमखनीगु विश्लेषण जुयाच्वंगु दु । अफगानिस्तानय् मिसा व मिजंतय्त ब्वंकेगु निंतिं माक्व थाय् मदु । अथे हे मिस्तय्त ब्वंकेत नं गाक्क मिसा शिक्षकत नं अफगानिस्तानय् मदु । खय्ता ला मन्त्री अब्दुलं मिजं शिक्षकतय्सं पर्दा लिउने च्वना ब्वंकेफइ धाःगु दु । थुकिं यानाः मिस्त शिक्षां बञ्चित जुइगु खनेदु । विश्वविद्यालय जक मखसे प्राथमिक तहनिसें हे मिसा व मिजंतय्त अलग अलग तयाः ब्वंकेगु धाःगु दु ।