मंसिर १६ गते उपनिर्वाचन यायेत सिफारिस

येँ (नेपालभाषा टाइम्स)- निर्वाचन आयोगं वइगु मंसिर १६ गते उपनिर्वाचनया तिथि क्वःछीत सरकारयात सिफारिस याःगु दु । म्हिगः प्रमुख निर्वाचन आयुक्त दिनेशकुमार थपलिया सहितया पदाधिकारीपिंसं प्रधानमन्त्री केपी शर्मा ओलीयात नापलानाः मंसिर १६ गते स्थानीय तहया उपनिर्वाचनया तिथि क्वःछीत सुझाव बिउगु खः । प्रधानमन्त्री ओलीं थःपिंसं आयोगया प्रस्ताव अध्ययन यानाः याकनं हे तिथि क्वःछिइगु खँ धाःगु दु ।

स्थानीय तहलय् थौंकन्हय् प्वनाच्वंगु जिल्ला समन्वय समितिया निम्ह प्रमुख सहित ४१ म्ह जनप्रतिनिधिया ल्यं दनिगु कार्यकालया नितिं उपनिर्वाचन यायेमाःगु दु । थुगुसी येँ जिल्लाय् किपू नगरपालिकाया मेयर, वडा १ व ४ या अध्यक्ष, येँ महानगरपालिका वडा १६ या वडा अध्यक्षया निर्वाचन यायेमाःगु दु ।