राष्ट्रवादया खण्डीकरण
न्हापांखुसी प्रधानमन्त्री जूबलय् भारतलिसे टक्कर कयाः राष्ट्रवादी छबी दयेकेत ताःलाःम्ह प्रधानमन्त्री केपी ओलीयात संयोगवस आः हानं अथे हे राष्ट्रवादी छबी दयेकेगु मेगु छगू अवसर चूलाः वःगु दु । थुपालय् वय्कःयात युरोपियन युनियनलिसे टक्कर कयाः थःगु राष्ट्रवादी छबीयात अझ टल्के यायेगु न्हूगु मौका चूलाःगु खः । युरोपियन युनियनया निर्वाचन अनुगमन समितिं नकतिनि सार्वजनिक याःगु चुनावी लिच्वलय् उल्लेख यानातःगु छगू लाइनं यानाः प्रधानमन्त्रीं समेत न्ववाये माःगु अवस्था पिहां वल । खास यानाः निर्वाचन प्रणालीइ खस–आर्य समुदाययात नं आरक्षण बियातःगु मिले मजू धकाः रिपोर्टय् च्वयातःगु कारणं राष्ट्रवादया थपाय्धंगु बबाल मुद्दा खडा जूगु खः ।ईयुया रिपोर्टय् उल्लेख जुयाच्वंगु थ्व लाइनयात अस्वीकार यासें सरकार लगायत थीथी निकायतय्सं गुगु प्रतिकार याःगु खः उकियात थौंकन्हय् ‘राष्ट्रवादी’ अडान धकाः व्याख्या याना हःगु दु । लिसें वहे दृष्टिकोणं थुकिया तारिफ नं शुरु जूगु दु ।
सरकारया थ्व अडानयात विपक्षी पार्टीतय्सं समेत ‘वाह ! वाह !’ याना हःगुलिं आः नेपाःया राष्ट्रवादी धारय् देय्या सकलें राजनीतिक दलत थःपिनि दलीय सीमायात त्वःताः छधी जू वःगु हे खः लाकि धइगु आभास समेत बियाच्वंगु दु । थ्वहे इलय् देशय् ब्वलंगु थ्व ‘राष्ट्रवादी’ लहरं छगू गम्भीर न्ह्यसः धाःसा थना बिउगु दु । ईयु विरुद्ध थौं सरकार लगायत सत्तारुढ पार्टी व विपक्षी पार्टीतय्सं समेत गुगु अडान काःगु खः, व धाथें नेपाःया राष्ट्रवादी अडान हे खः ला ? थ्व अडान हे नेपाःया मूल ‘राष्ट्रवादी’ अडान खः ला ? यदि थ्वहे झीगु राष्ट्रवादी अडान खःसा झीसं तप्यंक हे धाःसां जिल कि नेपाःया राष्ट्रवाद थौंया मितिंनिसें पूवंक हे खण्डित जुल । आः ब्वलनाच्वंगु थ्व ‘राष्ट्रवादी’ लहरं वास्तवय् नेपाःयात जोडे याइ मखु तोडे याइ । राष्ट्रवाद ला वास्तवय् मुक्कं देय्यात छधी याइगु राष्ट्रिय सूत्र जुइमाःगु खः । तर आः बय्बय् जुयाच्वंगु ‘राष्ट्रवादं’ देय्यात छधी याइ मखु बल्कि छधी जुयाच्वंगु देय्यात विभाजित यायेगु ज्या जक याइ ।
युरोपियन युनियनं नेपाः सरकारयात बिउगु सुझाव खः, नेपाःया निर्वाचन सम्बन्धी प्रणालीइ खस आर्ययात बियातःगु आरक्षण चीकेमाः । ईयुया थ्व सुझावयात स्वीकार याये मखु धकाः सम्पूर्ण राज्यसत्ता व विशेष यानाः खस आर्य समुदायया राजनीतिक नेतातय्सं गुगु अडान काःगु खः, उकियात थौंकन्हय् ‘राष्ट्रवादी अडान’ धया हःगु खः । तर ईयुपाखें थ्व गुगु सुझाव वःगु खः, थ्व छगू विदेशी निकायपाखें वःगु खःसां व वयागु निजी मुद्दा धाःसा मखु । नेपालय् उत्पीडित समुदायं न्हापांनिसें ल्ह्वना वयाच्वंगु हे मुद्दा खः । अय् जूगुलिं ईयुपाखें वःगु थ्व सुझावयात राज्यं अस्वीकार याःसां आदिवासी जनजाति, मधेसी, दलित थेंज्याःगु उत्पीडित समुदायं धाःसा समर्थन यात । गुकियात छगू समुदायं ‘राष्ट्रवाद’ धाःगु खः वहे ‘राष्ट्रवाद’ यात मेगु समुदायं अस्वीकार याना बिल । थुकिं स्पष्ट क्यनी, नेपाःया राष्ट्रवाद विभाजित दु । गन राष्ट्रवाद विभाजित जुइ, उकिया मेगु अर्थ राष्ट्र नं विभाजित धाःगु खः । गबले तक राज्यं थुकियात राष्ट्रवाद धयाच्वनी अबले तक नेपाः विभाजित जुयाच्वनी । नेपाः बरु विभाजित जूसां जिउ तर थ्वयात हे राष्ट्रवाद धायेगु त्वःते मखु धकाः सुनां धाल धाःसा व ति तःधंगु राष्ट्रघात मेगु छु जुइ ?
छगू राष्ट्र दुने निगू ‘राष्ट्रवाद’ च्वने फइ मखु । छगू राष्ट्र दुने निगू राष्ट्रवादया जन्म जुइगु धइगु कन्हय् राष्ट्र नं निगू हे जू वनी धइगु खायूगु सत्यया संकेत खः । थ्व अवस्थाय् गबले तक राष्ट्र निकू जू वनी मखु अबले तक द्वन्द्व जुयाच्वनी । व द्वन्द्व शान्तिपूर्ण नं जुइफु, हिंसात्मक नं जुइफु । राज्यं ईयुया सुझावयात अस्वीकार याःगु धइगु ईयुया गुगुं निजी स्वार्थयात अस्वीकार याःगु मखु । व ला थःगु हे देशया उत्पीडित जनतां ल्ह्वनाच्वंगु छगू मागयात अस्वीकार याःगु खः । थ्व स्वयां न्ह्यः मधेस आन्दोलन जूबलय् नं तत्कालिन प्रधानमन्त्री केपी ओलीं भारतं बिउगु सुझावयात अस्वीकार यानादीगु खः । तर व नं भारतया गुगुं निजी स्वार्थयात अस्वीकार याःगु मखु । अबले नं थःगु हे देशया मधेसी जनतां ल्ह्वनाच्वंगु मागयात राज्यं अस्वीकार याःगु खः । अबले प्रम ओलीं नाकाबन्दी खोले मयाःतले भारत भ्रमण याये मखु धकाः क्वातुगु अडान कयादिल । वय्कःया उगु अडानयात नं राष्ट्रवादी अडान धकाः बय्बय् याःगु खः ।
तर व वास्तवय् धाथेंया राष्ट्रवादी अडान धाःसा मखु । प्रम ओलीं अबले कालापानीइ तैनाथ यानातःपिं भारतीय सेना हटे मयाःतले भारतया भ्रमण याये मखु धकाः अडान कयादीगु जूसा, अथवा भारतं अतिक्रमण यानातःगु सुस्ताया नेपाली भूभाग लित मबिउतले भारत भ्रमण याये मखु धकाः अडान कयादीगु जूसा, अथवा नेपाःयाके मन्यँसें दयेकूगु लक्ष्मणपुर बाँधया निर्माण रोके मयाःतले भारत भ्रमण याये मखु धकाः अडान कयादीगु जूसा उकियात सही अर्थया राष्ट्रवाद धाये फइगु खः । तर अज्याःगु अडान वय्कलं न अबले कयादिल, न आः कयादिल ।प्रम ओलीं अबले अथवा आः अज्याःगु अडान कयामदीगुया दोष वय्कः याकःचित जक बियां धाःसा मगाः ।
थुकिया दोष माओवादी नेता पुष्पकमल दाहालयात नं वनी, नयाँ शक्तिया अध्यक्ष बाबुराम भट्टराईयात नं वनी, राप्रपाया अध्यक्ष कमल थापायात नं वनी, अले पुलांम्ह जुजु ज्ञानेन्द्र शाहयात नं वनी । वय्कःपिनिगु हे खने दुगु व खने मदुगु गठजोडं नेपाः राज्यं थज्याःगु राष्ट्रवादया निर्माण याःगु खः । आः नकतिनि ईयुपाखें वःगु सुझावयात नं ओली सिबें न्ह्यः बाबुराम भट्टराईनं विरोध याःगु खँयात थन ल्वःमंके मजिउ । अन्त्यय्, ईयुपाखें खस आर्ययात कोटापाखें चीकेमाः धकाः बिउगु सुझावयात गुगु व्यापक ढंगं विरोध याना हःगु खः, व विरोधपाखें हे क्यना बिल वास्तवय् ईयुं धाथें सही सुझाव बिउगु जुयाच्वन । राज्य अझ नं खस आर्य छगू समुदायया जक कब्जाय् लानाच्वंगु दु धइगु खँ थ्व विरोधं पुष्टि याइ । ईयुया सुझाव कार्यान्वयन जूसा हे जक थ्व अवस्थापाखें राज्य मुक्त जुइ फइ ।
LEAVE YOUR COMMENTS