चलः लिपा ‘सुख्खा चलः’ या खतरा

येँ – अप्वः यानाः वा वइगु मौसमय् पहाडी लागाय् चलः वनाच्वंगु दइ । थ्व यक्वस्यां सिउगु खँ जुल । तर वा वइगु मौसम सिधयेधुंकाः वयां लिपा सुख्खा जुयाः ‘सुख्खा चलः’ वनाः नं आपालं हन्ताः जुइगु बारे धाःसा यक्वस्यां सिउगु दइ मखु । नेपाः नं थज्याःगु सुख्खा चलखं दुःख बीगु थीथी देय्त मध्ये छगू लाः ।

नकतिनि वा वयेगु मौसम क्वचाल, आः सुख्खा मौसम सुरु जुइ । थज्याःगु सुख्खाया कारणं यानाः नं चलः वनाच्वंगु दइ । थज्याःगु चलः खास यानाः गाडी वनीगु सतक दयेका तःगु राजमार्ग लागा व जलविद्युत परियोजना दयेकातःगु लागाय् अप्वः वनीगु खतरा दु । नेपालय् दँय्दसं हे सलंसःगू थासय् हे थज्याःगु सुख्खा चलः वनाः आपालं जनधनया नोक्सान जुयाच्वंगु दु ।

दँय्दसं थज्याःगु सुख्खा चलः वनाः आपालं नोक्सान जुयाच्वंसां नेपाः सरकारं आः तक थज्याःगु सुख्खा चलः बारे गबलें अध्ययन तकं मयाःगु खँ नं सीदुगु दु । अथे खःसां थुगुसी थीथी गैरसरकारी संस्थातय्सं थुकिया अध्ययन यासें सरकारयात चलः वने स्वयां न्ह्यःहे सतर्क जुइत व छुं जुयाः चलः वन हे धाःसां माःगु तयारी यायेत धकाः सुझाव समेत बिउगु दु ।

थ्व सुझाव वयेधुंकाः सरकारं गनं मानव वस्ती चीके माल धाःसा छु यायेगु अध्ययन याकूगु खँ धाःगु दु । खास यानाः २०७२ सालया तःभुखाय् लिपा नेपाःया आपालं पहाड चिरिबाःगु जुयाः वा वइगु मौसमय् अथे चिरिबाःगु थासं लः दुहां वनीगु व सुख्खा मौसमय् वहे चिरिबाःगु थासय् तज्यानाः चलः वनीगु खः । भुखाय् लिपा थुकिया बारे नं यक्वं अध्ययन यानाः सरकारयात रिपोर्ट बियातःगु दु ।