विद्या भण्डारी व एमालेया स्वापू छु दु ?

येँ (नेपालभाषा टाइम्स)- पुलांम्ह राष्ट्रपति विद्यादेवी भण्डारी व नेकपा (एमाले) दथुइ थौंकन्हय् छु स्वापू दु ? एमालेया वरिष्ठ नेतात धमाधम भण्डारीया छेँय् वनाः वय्कःयात नाप लानाच्वंगु दु । थ्व खँयात कयाः पिने थीथी कथंया चर्चा नं जुयाच्वंगु दु । म्हिगः एमालें याःगु पत्रकार सम्मेलनय् नं खँपिहां वल ।

उकी लिसः बिसें एमाले अध्यक्ष ओलीं धयादिल, ‘पूर्व राष्ट्रपतिज्यू जिमिगु पार्टीया सम्मानित नेता ला जुयादीगु हे खः । उकिं जिमि नेतातय्सं वय्कःयात नापलाइगु छुं अस्वाभाविक मखु । बिष्णु पौडेलं नापलानादीगु दु । जिं नं नापलानागु दु । थथे नापलात धायेवं वय्कःयात पार्टीइ दुहां वये माल धकाः इनाप यात धकाः थुइकेगु गल्ती जुइ । अज्याःगु खँय् मलजल मयाःसां जिउ ।’

वय्कलं विद्या भण्डारीयात एमालें हानं पार्टी नेतृत्वय् वा धकाः सःतेगु ज्या मयाःगु खँ कनादीगु खः । थौंकन्हय् विद्या भण्डारीं हे एमालेया थीथी नेतातय्त सःताः खँल्हाबल्हा ब्याकाच्वंगु खँ सार्वजनिक जुयाच्वंगु दु । भण्डारीयात नापलाना वःपिं गुलिखे नेतातय्सं सार्वजनिक रुपं हे भण्डारीयात एमालेय् लित हयाः नेतृत्व बीमाः धकाः न्ववायेगु याना हःगु दु ।

म्हिगःया पत्रकार सम्मेलनय् न्ववासें अध्यक्ष ओलीं यदि ओली मन्त धाःसा एमाले टुक्रा टुक्रा जुया वनी धकाः नं हल्ला यानातःगु जुयाच्वन, अज्याःगु लँय् लुइगु हल्लायात इस्यू दयेकादी मते धकाः नं इनाप यानादिल ।

नेपालभाषा टाइम्स

च्वमिया मेमेगु

• जुगि जातया आवासया समस्या
• मेलम्चीया लः वइगु अझं अनिश्चित
• बँ पसः तयेके हे मबीगु बालेनया अडान
• फणीन्द्रयात सिद्धिदास सिरपाः
• इहिपा ज्याझ्वलय् मिं नयाः सछिम्ह मल्याकं सित