एमालेय् माधव नेपाल पुचःया न्हूगु प्रस्ताव – ‘सदस्यता नवीकरण ज्या दिकि’

येँ – एमालेया वरिष्ठ नेता माधव नेपालं पार्टी एकताया नितिं थःपिं तयार दु तर एकता धाःसा सम्मानजनक जुइमाः धयादीगु दु । म्हिगः थःगु पक्षया केन्द्रीय दुजःतय् बैठकय् वय्कलं थ्व खँ धयादीगु खः ।

मुँज्याय् सहभागी छम्ह केन्द्रीय दुजलं नेपालया धापूयात न्ह्यथँसें धयादिल, ‘पार्टी जिं दयेकागु खः, एजेन्डाय् झी त्याःगु दु, केपीया ज्यादतीपूर्ण, निरंशुक पलाःया कारणं आःया अवस्था वःगु खः, पार्टी एकताया निंतिं तयार दु तर सम्मानजनक एकता जुइमाः ।’
उकथं हे बैठकय् केन्द्रीय दुजः जगन्नाथ खतिवडां ओलीलिसे क्वमिलु जुयाः वनेमाःगु आवश्यकता मदु धासें समान हैसियतं एकताया सहमति जुइमाःगु खँ धयादीगु खः ।
बैठकय् न्ववाःपिं केन्द्रीय दुजः– तय्सं एकताया निंतिं हथाय् चाये मजिउ, क्वमिलु जुयाः वनेगु आवश्यक मजू धासें ओलीं वंगु इलय् याःगु गल्ती महसुस यायेमाःगु व ओलीयात आवश्यक जुयाः जक एकता यायेत्यंगु धकाः द्वपं बिउगु खः ।

ओली पुचलं यायेत्यंगु अधिवेशन व पार्टी सदश्यता इनेगु ज्या दिकेमाःगु माग नं नेपाल पुचःया उगु बैठकं याःगु दु । बैठकय् सदस्यता नवीकरण व वडा कमिटीया अधिवेशन दिकाः सुझाव संकलन यायेमाःगु खँ नं वःगु खःसा एकता कार्यदलया दुजःपिंत उकिया जानकारी नं बीधुंकूगु खँ सीदुगु दु । नेपाल पुचलं झिगू बुँदे सहमति कथं २०७५ जेठ २ गतेया कमिटी च्वनाः जक मेगु प्रक्रिया न्ह्याकेमाःगु माग नं याःगु दु ।

बैठकय् उपाध्यक्ष भीम रावलं पार्टी अध्यक्ष केपी ओलीया अभिव्यक्तिं यानाः पार्टी एकताया वातावरण स्यंकाच्वगु खँ धयादीगु दु । वय्कलं थःपिंसं पार्टी एकताया निंतिं वातावरण तयार यानाच्वनागु खःसां नं ओलीया अभिव्यक्ति व गतिविधिं पार्टी एकताय् पंगः वये फइगु खँ धयादीगु खः ।

बैठक थौं तक न्ह्याइगु खँ धाःगु दु । थ्व स्वयां न्ह्यः ओली पुचलं माधव नेपालं ग्वसाः ग्वःगु केन्द्रीय कमिटीया बैठकया मान्यता मदु धासें प्रेस विज्ञप्ति जारी याःगु खः । बैठकय् नेपाल पक्षया ७३ म्ह केन्द्रीय दुजलं ब्वति काःगु खः ।

एकताया कुतः बन्द या – ओली
नेकपा (एमाले) या अध्यक्ष केपी ओलीं आः माधव नेपाल पुचःलिसे जुयाच्वंगु एकताया वार्ता बन्द या धकाः निर्देशन बियादीगु खँ सीदुगु दु । वय्कलं आः नेपाल पुचःलिसे एकता जुइ मखुत धयादीगु कारणं निगुलिं पुचलय् च्वनाः एकताया कुतः यानाच्वंपिं नेतातय्त मछिंगु खँ धाःगु दु । तर ओली पुचःया नेता–तय्सं धाःसा ओलीं धाःसां नं कुतः जारी यानाच्वनेगु खँ धाःगु दु ।

 

सम्बन्धित बुखँ

LEAVE YOUR COMMENTS