ने. सं. ११४४ चौलाथ्व दशमी -

ओली नेपाली हिटलर – नेपाल

येँ – नेकपा एमालेया नेता माधव नेपालं पार्टी अध्यक्ष केपी शर्मा ओलीयात हिटलरया नेपाली अवतार धइगु संज्ञा बियादीगु दु । म्हिगः थःगु पुचःया विद्यार्थी संगठनयात सम्बोधन यासें नेता नेपालं प्रम ओली व्यक्तिवादी जूगु व कम्युनिष्ट आन्दोलनयात बिसर्जनया लँपुइ यंकूगु द्वपं नं बियादीगु खः ।

वय्कलं धयादिल, ‘प्रम ओलीं धात्थेंया एमाले जिपिं खः; ‘जबजया हिमायती जिपिं खः धइगु भ्रम न्यंकाच्वंगु दु, तर जबजलिसे ओलीया छुं नं स्वापू मदु । जबज धइगु बहुमतया निर्णय माने यायेगु खः, तर वय्कलं गुब्सं जबजया निर्णय माने यानामदी ।’

सम्बोधनया झ्वलय् नेता नेपालं प्रम ओलीं केन्द्रीय कमिटीइ थः जःखः च्वनीपिं व दासतय्त जक तयातःगु धासें उमिके मखुगु खँया आलोचना यायेगु हिम्मत मदुगु खँ धयादिल । प्रम ओलीं पार्टी दुने निरंकुशता कायम यायेगु स्वःगु धासें थःपिंसं ओलीया विरोध यानागु मखुसें ओली प्रवृत्तियात जक विरोध यानागु खँ नं स्पष्ट यानादिल ।

लिसें वय्कलं प्रम ओलीं थःत न्यंगु स्पष्टीकरण खनाः थः ग्याये मखु धासें म्हिगः छम्ह नेतां प्रम ओलीलिसे मिले जु, कारबाही हे याःसां सह या धकाः थःत सुझाव बिउगु खँ लुमंकादिसें धयादिल, ‘पुलिं चुइगु ज्या जुइ मखु, आत्मसमर्पणया लँपुइ वनेगु खःला ? थ्व खँ गबसं मञ्जुर जुइ मखु ।’

वंगु चैत ७ गते च्वंगु एमाले केन्द्रीय कमिटीया बैठकं माधव नेपाल, भीम रावल, घनश्याम भुसाल व सुरेन्द्र पाण्डेयात स्पष्टीकरण कायेगु निर्णय याःगु खः । नेता नेपालं प्रम ओलीं जालझेल यानाः पार्टी कब्जा याःगु द्वपं बियादिसें ओलीं पार्टी त्वःता वनेमाःगु बिचाः नं तयादिल ।
थ्वहे झ्वलय् एमाले ओली पक्षीय सांसद खगराज अधिकारीं प्रधानमन्त्री ओलीं राजीनामा बी मखु खँ धासें वय्कःयात फुसा अविश्वासया प्रस्तावं चीकेत हाथ्या बियादीगु दु ।

म्हिगः प्रतिनिधिसभाया बैठकय् न्ववासें सांसद अधिकारीं अविश्वासया प्रस्ताव हये मफुपिंसं छाय् प्रधानमन्त्रीयात नैतिकता स्यनेमाःगु धकाः न्ह्यसः नं थनादीगु खः । वय्कलं धयादिल, ‘नैतिकता ला गज्जबया दु, सरकारयात बियातःगु समर्थन लित कायेत ग्यायेगु, अले प्रधानमन्त्रीयात हे नैतिकता स्यनेगु ? अविश्वासया प्रस्ताव हल धाःसा फेल जुइ धकाः ग्यायेगु अले प्रधानमन्त्रीयात नैतिकता स्यनेगु ला ?’
वय्कलं सभामुख अग्निप्रसाद सापकोटायात इंगित यासें न्ह्यसः न्यनादिल, ‘सभामुखजु, छि निर्वाचित जूगु इलय् नेकपापाखें सभामुख जुयादीगु खः, आः उपसभामुखया निर्वाचन जुल धाःसा दलीय संलग्नता सुयागु धायेगु ?’