तिलक प्रकाशया निगू कृति विमोचन

ख्वप (नेपालभाषा टाइम्स)- साहित्यकार तिलक प्रकाशया निगू कृति विमोचन जूगु दु । ९० दँ थ्यनेत्यंम्ह साहित्यकार तिलक प्रकाशया आत्मकथा ‘मेरो कथा मेरो ब्यथा’ व वय्कःया पिहांवःगु थीथी कृतिया भूमिका मुंकातःगु सफू ‘तिलक प्रकाशका कृतिहरुका भूमिका’ विमोचन मू पाहाँ पुलांम्ह सभामुख दमननाथ ढुंगाना व नेपाल प्रज्ञा प्रतिष्ठानया उपकुलपति विमल निभाः नं यानादीगु खः ।

ज्याझ्वलय् न्ववानादिसें पुलांम्ह सभामुख ढुंगानां नेपालःया राजनीति क्षेत्रय् नं तिलक प्रकाशया भूमिका महत्वपूर्ण दुगु खँ न्ह्यथनादिसें वय्कःया छलछाम यानाः राजनीति यायेमसःगुलिं राजनीतिइ लिउने लाःगु खँ धयादिल ।

अथेहे प्रज्ञा प्रतिष्ठानया उपकुलपति व साहित्यकार विमल निभाःनं भाजु तिलक प्रकाशया राजनीति स्वयां नं साहित्यं तःधं जूगु धासें वय्कःयात राजनीतिं स्वयां नं साहित्यं परिचति यानाबिउगु खँ कनादिल । थ्व झ्वलय् साहित्यकार तिलक प्रकाशयाके राजनीति जक मखु इतिहासया नं चेत दुगुलिं वीरपिनि जीवनी च्वयाः नेपाली साहित्यय् तःधंगु योगदान यानादीगु खँ कनादिल ।

तिलक प्रकाशया सफू पिथंगु तिसा ट्रस्टं सञ्चारकर्मी सञ्जिव दुलालयात लेखनवृति नं लःल्हाःगु खः । तिसा ट्रस्टं दँय्दसं ख्वपया कला, संस्कृति, लेखन विधाय् क्रियाशील व्यक्ति व संघसंस्थायात आर्थिक ग्वाहालि याना वयाच्वंगु दु । थ्व झ्वलय् संचारकर्मी दुलालयात न्यय्द्वः तकाया लेखनवृति बियागु खँ तिसा ट्रस्टया संचालक प्रशान्त कायस्थं कनादीगु दु । ज्याझ्वलय् भाजु तिलक प्रकाशया सफू पिथनेगु निंतिं ग्वाहालि यानादीपिं अगिब बनेपाली व सुमि बनेपालीयात नं सम्मान याःगु खः ।

ज्याझ्वलय् न्ववानादिसें तिसा ट्रस्टया रञ्जन कायस्थं ट्रस्टपाखें लिपा नं थीथी साहित्यिक गतिविधि यानावनेगु खँ कनादीगु खः ।