ने. सं. ११४६ चाैलाथ्व तृतीया -

प्रहरी चौकीइ नेवाः भाय् बन्देज

येँ (नेपालभाषा टाइम्स)- पञ्चायत कालय् थें आः गणतान्त्रिककालय् नं प्रहरी चौकी दुने नेवाः भासं खँ ल्हाये मदु धकाः नेवाःतय्त थःगु मांभासं खँ ल्हायेत पनेगु ज्या जूगु दु ।
म्हिगः ख्वपया जिल्ला प्रहरी कार्यालय दुने हिरासतय् तयातःपिं बन्दीत नापलाः वंपिं उमि थःथितियात अन कार्यरत प्रहरीं नेवाः भासं खँ ल्हाये दइ मखु धकाः पनेगु ज्या याःगु खः ।

थःत प्रहरी ज्याकू दुने नेवाः भासं खँ ल्हाये दइ मखु धकाः पं वःगु खँयात कयाः छम्ह स्थानीय पीडितं सामाजिक सञ्जालयय् भिडियो पोष्ट यायेवं थ्व मुद्दा चर्चाया विषय जूगु खः ।

ख्वपय् जूगु बिस्काः जात्राय् अप्पां कयेकूगु द्वपनय् प्रहरीं ज्वनाः हिरासतय् तयातःपिं मनूत नापलाः वंबलय् प्रहरीं उमित नेवाः भासं खँ ल्हाये दइ मखु धकाः पनेगु ज्या याःगु खः । कुनातःपिं मनूत नेवाः खःसा नापलाः वंपिं पासापिं व थःथितिपिं नं नेवाः हे खः । उमि थवंथवय् नेवाः भासं ल्हात धकाः छम्ह असई वयाः ‘थन नेवाः भासं खँ ल्हाये दइ मखु’ पं वःगु खँ पीडितं धाःगु दु । थम्हं छाय् नेवाः भासं खँ ल्हाये दइ मखु धकाः न्ह्यसः तयाबलय् प्रहरीं थन मथूगु भासं खँ ल्हाये दइ मखु धइगु नियम हे दु धकाः लिसः बिउगु खँ नं वय्कलं कनादिल ।

लुमंकेबहः जू, न्हापा पञ्चायतकालय् जक खोरय् कुनातःपिं कैदीलिसे नेवाः भासं खँ ल्हाये दइ मखु धकाः प्रहरीं पनीगु खँ चर्चाय् वःगु खः । भाषा आन्दोलनया न्ह्यलुवा पद्मरत्न तुलाधरयात समेत छक्वः जेलय् कुनातःबलय् वय्कःया मांयात नेवाः भासं खँ ल्हाये दइ मखु धकाः पना बिउगु खः । नेवाः बाहेक मेगु खँ ल्हाये मसःम्ह वय्कःया मां कायलिसे खँ हे मल्हासे मिखाय् ख्वबि जायेक तयाः लिहां झाःगु खः । पञ्चायतकालीन उगु विभेदकारी ज्याखँ आः समावेशीकृत धाःगु इलय् तकं कायम जुयाच्वंगु खँ धाःगु दु ।

प्रस्तावित कानूनय् छु व्यवस्था दु ?
बागमति प्रदेशया सरकारं दयेकाच्वंगु भाषा सम्बन्धी कानूनया मस्यौदाय् गनं नं सरकारी निकायय् भाषा छ्यःगु खँयात कयाः याइगु थज्याःगु विभेद दण्डनीय जुइ धकाः उल्लेख यानातःगु दु । बागमती प्रदेशय् नेपालभाषा व तामाङ भाषायात नं सरकारी ज्याखँया भाषा कथं मान्यता बीगु लागिं सरकारं यानाच्वंगु विधेयकया मस्यौदाय् थज्याःगु व्यवस्था यानातःगु खः ।

प्रस्तावित मस्यौदाया परिच्छेद २ या दफा ४ य् ‘विभेद व अपमानजन्य व्यवहार विरुद्ध व्यवस्था’ धकाः भाषाया आधारय् विभेद याइपिं सजाय बीगु खँ न्ह्यथनातःगु दु । उगु दफाया उपदफा (१) य् धयातःगु दु – नेपालय् उत्पत्ति जूगु मांभाय् प्रयोग जुइगु सरकारी, सार्वजनिक व निजी कार्यालयय् भाषा प्रयोग याःगु आधारय् विभेद याःगु ठहर जुल धाःसा थ्वहे ऐनय् व्यवस्था यानातः कथं वा थुकी व्यवस्था याना मतःसा प्रचलित संविधान कथं कसूर याःगु ठहर जुइ ।

अज्याःगु विभेद याःम्ह मनू यदि सरकारी कर्मचारी जुल धाःसा वयात निलम्बन तक याये फइगु व्यवस्था नं उगु मस्यौदाय् यानातःगु दु । सरकारं याकनं हे थ्व मस्यौदाय् प्रदेशसभाय् पेश यायेत्यंगु दु ।