२७ वडापाखें थीथी ख्यःया व्यक्ति हनेज्या

येँ(नेपालभाषा टाइम्स)- येँ महानगर पालिका २७ वडापाखें थीथी ख्यलय् योगदान बियादीपिंत हनेज्या याःगु दु । येँ मनपा २७ वडाय् जन्म जुयाः देय् व समाजया निंतिं विशिष्ट योगदान बियादीपिं व्यक्तित्वपिंत हनेज्या याःगु खः ।

ज्याझ्वलय् समाजसेवालिसें कला, साहित्य, शिक्षा, कानून, स्वास्थ्य, वित्त, निजामति सेवा नापं सैनिक सेवापाखें समाज, वडालिसें देय्या निंतिं योगदान बियादीपिंत हनेज्या याःगु खः ।

येँ महानगरपालिका २७ वडाअध्यक्ष योगेशकुमार खड्गीया सभापतित्वय् जूगु ज्याझ्वलय् संघीय सांसदलिसें पुलांम्ह रक्षामन्त्री भिमसेनदास प्रधान मूपाहांकथं झायादीगु खः । ज्याझ्वलय् येँ मनपा २७ वडाया निवर्तमान वडाअध्यक्ष चिनियामान वज्राचार्य, पूर्व वडाअध्यक्ष विजयनारायण मानन्धर व नारायणकृष्ण श्रेष्ठ पाहांकथं झायादीगु खः ।

ज्याझ्वलय् साहित्य व कलापाखें नांजाःम्ह कवयित्री नारायणदेवी श्रेष्ठ व लाभरत्न तुलाधर, शिक्षापाखें द्वारिकाप्रसाद श्रेष्ठ, नातीकाजी महर्जन, चन्द्रप्रकाश राजभण्डारी, शिला प्रधानांग राजभण्डारी, स्वास्थ्यपाखें डा. विजयलाल श्रेष्ठ, डा. ईश्वरनाथ श्रेष्ठ, डा. माणिकरत्न वज्राचार्य, निजामतिपाखे नेपाल सरकारया पूर्व सचिव वासुदेव प्रधान, रञ्जन लाकौल, डा. हेरम्बबहादुर राजभण्डारी, सैनिक सेवापाखें प्रकाश थापा, वित्तीय क्षेत्रपाखें पूर्व डेपुटी गभर्नर कृष्णबहादुर मानन्धर, कानूनी सेवापाखें डा. रञ्जितभक्त प्रधानांगयात हनेज्या याःगु खः ।

सम्मानित व्यक्तित्वयात हनापौ लःल्हानादिसें मूपाहां प्रधानं २७ वडा ज्याकूपाखें दकलय् न्हापां थुकथं समाज व देय्या निंतिं योगदान बियादीपिंत हनेज्या याःगु च्वछायेबहजू धासें थुकथंया ज्याझ्वः मेमेगु वडापाखें नं निरन्तर रुपं याना यंकेमाःगु खँय् बः बियादिल ।

ज्याझ्वःया सभापतिलिसें २७ वडाअध्यक्ष खड्गीं सम्मानित सकसितं भिंतुना बियादिसें वडापाखें वइगु दिनय् नं थुकथं योगदान बियादीपिं व्यक्तित्वया हनेज्यायात निरन्तरता बिया वनेगु जानकारी बियादिल ।

वडा सदस्य श्रृष्टि कंसाकार तुलाधरं लसकुस यासें वडापाखें निरन्तर रुपं थुकथंया ज्याझ्वः न्ह्याका वनेगु योजना दुगु जानकारी बियादीगु खः ।