असनय् संक्रमितया जःलाखःला थौं स्वाब संकलन याइगु

येँ (नेपालभाषा टाइम्स) – असनय् बालंच्वनाच्वंपिं भारतीय नागरिकयात कोरोना भाइरस संक्रमण जुइवं म्हिगः येँ महानगरपालिकाया जनस्वास्थ्य विभागं कन्ट्रायक ट्रेसिङ याःगु दु। म्हीगः असंया ग्वसिफः व भमलु त्वाः जःखः बालंच्वनाच्वंपिं भारतीय नागरिकयात कोरोना भाइरस संक्रमण जूगु लुइवं म्हिगः येँ महानगरपालिकाया जनस्वास्थ्य विभागं कन्ट्रायक ट्रेसिङ याःगु खँ येँ महानगरपालिका जनस्वास्थ्य विभागया
प्रमुख नरेन्द्रविलाश वज्राचार्यं ‘नेपालभाषा टाइम्स’ यात कनादीगु दु ।

वय्कःया कथं म्हिगः महाबौद्ध व असंया चय्म्ह निसें गुइम्हेसिया कोरोना परीक्षणया निंतिं नां च्वकूगु खः । थौं २७ वडा ज्याकुथी म्हिगः नां च्वकूपिनगु स्वाब संकलन याइजु जूगु दु। वडाय् संक्रमित खने दयेधुंकाः म्हिगः स्थानीय मनूत वीर अस्पतालय् वनाः कोरोना भाइरस जाँच याकेत वंगु खँ २७ वडाया वडाध्यक्ष चिनियाँमान वज्राचार्य ‘नेपालभाषा टाइम्स’ यात जानकारी बियादीगु दु ।

वय्कःया कथं म्हिगः संक्रमित खनेदुगु थाय्या झिंनिम्ह झिंस्वम्हेस्यां वीर अस्पतालय् वनाः कोरोना जाँच याःगु खः । संक्रमित मनूतय् तकसं सतिपिं म्हिगः जाँच याकेत वंगु खः । वय्कःया कथं संक्रमित बालं च्वनाच्वंगु छेँ जःखःया स्थानीय व पसः न्ह्यःने च्वंपिं जाँच यायेगु निंतिं वंगु खः । म्हिगः वीर अस्पतालं स्वाब संकलन यायेधुंकूगु व उकिया रिर्पोट थौं वइगु खँ धाःगु दु ।

व्यापारीयाके कोरोना भाइरसया संक्रमण खनेदयेवं म्हिगः महाबौद्धया नारायणी आर्केड पूर्ण रुपं बन्द जूगु दुसा म्हिगः हे आर्केटया लँपुइ सेनिटाइजर छ्वाकाः निमूलीकरण यायेगु ज्या नं जूगु दु। म्हिगः आर्केडया आपालं धइथें पसः बन्द जूगु जानकारी नं वडाध्यक्ष वज्राचार्य बियादीगु दु ।

भिंका च्वना
थुगु बुखँय् येँ महानगरपालिकाया जनस्वास्थ्य विभागया प्रमुख नरेन्द्रविलाश वज्राचार्य जुइमाः थाय् मेकथं जुयाच्वंगुलिं भिंका च्वना । – सम्पादक