गुगलय् भाय् हिलेगुनापं डब्लुडीबी ज्याझ्वः
येँ – गुगलय् नेपालभाषा भाय् हिलेगु (ट्रान्सलेट) सछि न्हु क्यंगु लसताय् छगू विशेष ज्याझ्वः जुल । वल्र्ड नेवाः अर्गनाइजेसन (डब्लुएनओ)या ग्वसालय् न्हियान्हिथं न्ह्यानाच्वंगु भाय् हिलेगु ज्याझ्वः सछि न्हु क्यंगु लसताय् वंगु बुधवाः उगु विशेष ज्याझ्वः जूगु खः ।
डब्लुएनओया नायः सिजन श्रेष्ठया सभापतित्वय् वय्कलं हे लसकुस यानादीगु ज्याझ्वलय् नेपाली कांग्रेसया सांसद भीमसेनदास प्रधान मूपाहांकथं झायादीगु खः । गुगलय् नेपालभाषा भाय् हिलेगु (ट्रान्सलेसन) ज्याझ्वः दकलय् न्हापां न्ह्याकादीम्ह मय्जु सुनिता डंगोलपाखें ‘भ्यालिडेसन’ यानाः न्ह्याःगु ज्याझ्वलय् गुगलया इन्जिनियर उज्जवल राजभण्डारीं आतक जुयाच्वंगु नेपालभाषा भाय् हिलेगु झ्वलय् जुयाच्वंगु उपलब्धिलिसें वइगु दिनय् गुकथं वनेगु धइगु बारे रणनीति, योजना व समयावधियात कयाः थःगु नुगःखँ तयादीगु खः ।
मूपाहांकथं झायादीम्ह प्रतिनिधिसभा सदस्य भीमसेनदास प्रधानं गुगलय् नेवाः भाय् दुथ्याकेगु थुकथंया च्वछायेबहगु ज्याया निंतिं डब्लुएनओलिसें थुकी ग्वाहालि याना वयाच्वनादीपिंत सुभाय् देछानादिल । थौंकन्हय् न्हूगु पुस्तां नेवाः भाय् ल्हायेगु त्वःता हयाच्वंगु इलय् गुगलपाखें नेवाः भाय् म्वाकातयेगु निंतिं जुयाच्वंगु कुतः अतिकं च्वछायेबहजू धयादिल ।
थः दकलय् न्हापां नेवाः, अनंलि नेपाःमि व अनं लिपा जक नेपाःया नागरिक खः धासें झीगु नेवाः भाय्यात अन्तर्राष्ट्रियकरण यायेत गुगु कुतः जुयाच्वन थ्व थःगु म्हगसं पिने लाःगु खँ जूगु व थुकथं जुयाच्वंगु ज्यायात थम्हं गुकथं फु उकथं ग्वाहालि यायेत तयार दु धयादिल ।
डब्लुएनओया संरक्षक दया शाक्यं भाय् हिलेगुलिइ वयाच्वंगु अनेकथंया नेवाः खँग्वःया समस्यात कयाः ध्वाथुइकादीगु ज्याझ्वलय् संस्थाया न्वकु संयुक्त श्रेष्ठं थुगु परियोजनाय् मदिक्क् ग्वाहालि यानादीपिनिगु नां ब्वनाः न्यंकादीगु खः ।
थुकथं हे ज्याझ्वलय् परियोजना पुचःया दुजः दिपेशमान शाक्यं सछि न्हुतकया भाय् हिलेगु व भ्यालिडेसनया ज्याया सफलता लिपा आः थुकियात निरन्तरता बीगु नापनापं थीथी ख्यःया व्यक्तित्वपिंत ब्वनाः वय्कःपिनिगु अनुभव कालबिल यायेगु ल्याखं न्हूगु ज्याझ्वः डब्लुडीबी (वल्र्ड नेवाः अर्गनाइजेसन डेल्ली ब्रोडकास्टिंग) ज्याझ्वःया घोषणा यानादीगु खः ।
ज्याझ्वलय् भाय् हिलेगु ज्याय् निरन्तर रुपं उच्च योगदान बिया वयाच्वंपिं पौभाः साय्मि व हिसिलिना शाक्यं थःथःगु अनुभव कनादीगु खःसा भाय् हिलेगुया अनुभवनापं वइगु दिनय् गुकथं वनेमाः धइगु विषयय् उदेन न्हूसाय्मिं थःथःगु विचाः तयादीगु खः । थुकथं हे भाय् हिलेगुलिइ मदिक्क योगदान बिया वयाच्वनादीम्ह मय्जु डा. लोचन मानन्धर, मय्जु विद्या दली, द्वारिका राजभण्डारी, मय्जु लुमु श्रेष्ठ, संस्थागत रुपं थुगु ज्याय् योगदान बिया वयाच्वंगु क्यानेडियन नेवाः गुथिया नायः विमल श्रेष्ठ, नेवाः नखः न्यूयोर्कया नरेशमान शाक्यं नं थःथःगु नुगःखँ व थःपिंसं याना वयाच्वनागु ज्याया बारे जानकारी बियादीगु ज्याझ्वलय् संस्थाया नारायण राजभण्डारीं सुभाय् देछानादीगु खःसा क्यानाडाय् च्वनादीम्ह रञ्जना सैंजू व अमर सैंजूं सितार वादनय् नेवाः धुन न्ह्यब्वयादीगु खः ।
LEAVE YOUR COMMENTS