ने. सं. ११४४ ञलाथ्व नवमी -

निक्वःगु रामशेखर लुमन्ति सिरपाः लःल्हात

ख्वप- रामशेखर लुमन्ति दबूपाखें दँय्दसं बिइगु निक्वःगु रामशेखर लुमन्ति सिरपाः बाखं च्वमि मनदेवी ताम्राकारयात लःल्हाःगु दु । । ताम्राकारया चिबाखं मुनाः ‘धुफ्वः’या निंतिं थ्व सिरपाः बिउगु खः ।
शनिवाः ख्वपय् जूगु छगू ज्याझ्वःया दथुइ रामशेखर ग्वाहालि पुचःया नायः व सिद्धिदास प्रतिष्ठानया नायः नरेन्द्रभक्त हाडां बाखं च्वमि मनदेवी ताम्राकारयात हनापौ लःल्हानादीगु खः ।

नीन्याद्वः तका दां सहितया उगु सिरपाः थ्वयां न्ह्यः बिराटया नायः महेन्द्र गोपाल कर्माचार्ययात लःल्हाःगु खः । ज्याझ्वलय् मूवक्ता डा. योगेन्द्र प्रधानं च्वमि, समीक्षक व ब्वँमिपिंत नापलाकेगु ज्या थीथी साहित्यिक संघ संस्थातय्सं यानाच्वनिगु कनादिसें रामशेखर लुमन्ति दबूपाखें थज्याःगु बांलाःगु ह्वताः चूलाकाच्वंगु खँ कनादिल ।

सिरपाः ल्यज्या पुचःया दुजः प्राज्ञ धु्रब मधिकर्मिं साहित्य च्वयेबलय् मौलिक खँग्वः छ्यलाः पात्रयात थःगु हे परिवेशय् कः घाये फत व थःगु हे पुलांगु रचना व कृति स्वयां बांलाका वने फत धाःसा जक साहित्यकार सफल जुइगु कनादिल । रेमित्यान्सं देय् न्ह्याकेत्यंगु अर्थविद् व योजनाबिद् धाःपिनि विरुद्ध केन्द्रीत धुफ्वः बाखं मुनाया धुफ्व नांगु बाखं न्यंकूसें थःगु नुगःखँ कनादीम्ह पुरस्कृत व्यक्तित्व मनदेवी ताम्राकारं थःगु साहित्यिक यात्रा बारे ध्वाथुइकादीगु खः । ज्याझ्वः रामशेखर लमन्ति दबूया नायः गोबिन्दमान श्रेष्ठया सभापतित्वय् जूगु खः ।

थुगुसी बाखं च्वमिपिं श्याम आशा, विद्या बहादुर बज्राचार्य, यज्ञरत्न धाख्वाः, ईश्वरीमैंया श्रेष्ठ, सुरेन्द्रलाल भुजु व मनदेवी ताम्राकारया खुगू बाखं सफूयात कयाः मूल्यांकन जूगु खः ।