
ख्वप(नेपालभाषा टाइम्स)÷बाखं दबूया ग्वसालय् स्वनिगःया पर्यटकीया लगाया नगरकोटय् बाखं मुँज्या जुल । दबूया ग्वसालय् वंगु शुक्रवाः व शनिवाः निन्हुयंकं उगु बाखं मुँज्या जूगु खः ।
नांजाःम्ह बाखं च्वमि मदुम्ह लक्ष्मण राजवंशीयात सभापति दयेकाः न्ह्याःगु ज्याझ्वलय् वय्कलं नेपालभाषा बाखं ख्यलय् बियादीगु योगदान व बाखं दबू नीस्वनेत म्हितादीगु भूमिकायात कयाः नं चर्चा याःगु खः ।
बाखं दबूया संस्थापक दुजः लोचनतारा तुलाधरं लसकुस यानादीगु ज्याझ्वलय् न्हुछेभक्त कवां, श्याम आशा, केदार सितु, तेजकृष्ण श्रेष्ठ, निजिरोस श्रेष्ठ, भगतदास श्रेष्ठ, किरणकेन रंजित, लोचनतारा तुलाधर, विमलप्रभा वज्राचार्य, सुरेन्द्र भुजु, समान्त, मोहिनी चित्रकार, अञ्जना ताम्राकार, मीना वज्राचार्य, विमला शाक्य, मिलन शाक्यलिसें नीनिम्हेसिनं बाखं ब्वनाः न्यंकादीगु खः ।
मुँज्याय् ब्वंगु बाखंयात कयाः नांजाःम्ह समालोचक पूर्ण ताम्राकारं समीक्षा व केदार सितुं टिप्पणी यानादीगु खः । मुँज्याया झ्वलय् बाखं च्वमिपिनि दथुइ बाखं साहित्ययात कयाः सहलह नं जूगु खः । लिसें बाखं ख्यःयात अझ च्वन्ह्याका यंकेगु निंतिं नियमित रुपं सहलह यानाच्वनेमाःगु खँय् नं मुँज्याय् ब्वति कयादीपिंसं विचाः तयादीगु खः । ज्याझ्वलय् बाखं च्वमि बद्री वेदनां सुभाय् देछानादीगु खः ।
LEAVE YOUR COMMENTS