ने. सं. ११४४ ञलाथ्व दशमी -

ज्वंपिंत अझं मत्वःतूनि

प्यम्हसिनं चौकीइ हे अनशन शुरु यात

येँ–गैर न्यायिक सतक विस्तार विरुद्ध म्हिगः माइतीघर मण्डलाय् धर्ना बीगु झ्वलय् प्रहरीं ज्वंपिंत आतकं त्वःतूगु मदुनि । उपत्यकाव्यापी सतक विस्तार पीडित संघर्ष समितिया आह्वानय् म्हिगः माइतीघर मण्डलाय् शान्तिपूर्ण धर्नाय् च्वनाच्वंपिंत प्रहरीं हस्तक्षेप यानाः झिंस्वम्हेसित ज्वंगु खः ।

ज्वंपिंत म्हिगः न्हापां बानेश्वर प्रहरी चौकीइ यंकूगु खःसा इमित त्वःतकेगु निंतिं कुतः नं जूगु खः । ससफोया सांसद राजेन्द्र श्रेष्ठ, संघर्ष समितिया कजि सुमन साय्मि लगायतया कुतलय् त्वःतकेगु निंतिं कुतः जूगु खः । ज्वंपिं मध्ये निम्हेसित सार्वजनिक मुद्दा तयेगु व मेपिंत त्वःतेगु धायेवं मेपिंसं नं सकसितं विना शर्त त्वःतूसा जक वनेगु मखु वनेमखु धकाः अन हे स्वंगु खः । वयां लिपा चौकीइ च्वनेगु व्यवस्था मजुइवं म्हिगः हे बहनि ९ ताः इलय् सकसितं महानगरीय प्रहरी प्रभाग टेकुइ चलान याःगु ख ।

थौं सुथ न्हापां ज्वंपिंत त्वःतेगु निंतिं कुतः जूसां सफल धाःसा जूगु मदुनि । समितियात गृह मन्त्रालयं वार्ताया निंतिं सःतूगु व ज्वनातःपिंत विना शर्त रिहा मयाःतले थःपिं वार्ताय् मवनेगु समितिया कजि साय्मिं ‘नेपालभाषा टाइम्स’ अनलाइनयात कनादीगु दु ।

थ्व हे झ्वलय् ज्वंपिं मध्ये प्यम्हेसिनं चौकीइ हे अनशन शुरु याःगु सीदुगु दु । समितिया कजि साय्मिं ‘नेपालभाषा टाइम्स अनलाइनयात बियादीगु जानकारीकथं ज्वंपिं मध्ये नेपालभाषा आन्दोलनया न्ह्यलुवा कार्यकर्ता रमेशमान पिया, गौतम मानन्धर, गणपतिलाल श्रेष्ठ व श्याम प्रजापतिपिं अनशन च्वनादीगु खः । वय्कःपिंसं म्हिगःनिसें छुं हे मनःगु जक मखसे लः तकं मत्वःगु साय्मिं कनादीगु दु ।

उखे ज्वंपिंत विना शर्त रिहाइया निंतिं कुतः जुयाच्वंगु व गैर न्यायिक सतक विस्तार विरुद्ध म्हिगःया शान्तिपूर्ण धर्ना ज्याझ्वलय् प्रहरीं बल प्रयोग यानाः ज्वनेगु व घाःपाः तकं यायेगु ज्या जुइवं थौं हे समितिया छगू मुँज्या च्वनाः संघर्षया न्हूगु ज्याझ्वः पित बी फइगु सम्भावना दुगु समितिया कजि साय्मिं ‘नेपालभाषा टाइम्स’ अनलाइनयात कनादीगु दु ।