हरिसिद्धिइ कोरोनाया लक्षण खनेदुम्ह मिजंयात पाटन अस्पताल यंकल

यल– थनया हरिसिद्धिइ छम्ह मिजंयाके कोरोना संक्रमणया लक्षण खनेदयेवं वया परिवार सहित वयात पाटन अस्पतालय् यंकूगु दु । हरिसिद्धिया गुमज धाःथासय् च्वनाच्वंम्ह ४३ दँया उम्ह मिजंयाके म्हिगः शनिवाः निसें कोरोनाया लक्षण खनेदुगु खँ धाःगु दु । उम्ह मिजं वंगु चैत ७ गते दिल्लीं लिहां वःम्ह खः ।
वयाके कोरोनाया लक्षण खनेदयेवं यल महानगरपालिका वडा २९या अध्यक्ष गणेशकुमार महर्जन लिसें प्रहरीया सक्रियाताय् उमिगु परिवारयात पाटन अस्पताल यंकूगु खः । वया ३८ दँ दुम्ह कलाः, १९ दँ दुम्ह म्ह्याय् व १२ दँ दुम्ह काययात नं पाटन अस्पतालया आइसोलेसनय् तःगु खँ सीदुगु दु ।
पाटन अस्पतालं आः उम्ह मिजंया स्वाब लिकया परिक्षण यानाच्वंगु दु ।