ख्वप जिल्ला प्रशासन ज्याकूया साइनबोर्डय् रञ्जना लिपिं च्वयेत ध्यानाकर्षण
ख्वप (नेपालभाषा टाइम्स)÷ नेवाः देय् दबू ख्वप जिल्ला समिति व ख्वप नगर समितिया ग्वसालय् म्हिगःं शुक्रवाः ख्वप जिल्ला प्रशासनया प्रमुख रोशनी कुमारी श्रेष्ठयात ख्यें सगं नापं धौसगं बियाः भिंतुना देछायेगु ज्या जुल ।
ज्याझ्वलय् नेवाः देय् दबू स्वनिगः विशेष प्रदेशया नायः श्रीकृष्ण महर्जनं ख्वप जिल्लाया प्रशासनय् नेवाः भाय् जक ल्हाइपिंत खय् भाय् ल्हाये मसःगुलिं समस्या जूगु घटनात दु धयादिसें आवंलि भाषाया कारणं समस्या मजुइगु वातावरण तयार यायेमाः धयादिल । अथे हे महर्जनं ख्वप जिल्ला प्रशासनया ज्याकुथिइ नेवाःतय्गु रञ्जना लिपि नं
छ्यलेत ध्यानाकर्षण यानादिल ।
नेवाः देय् दबू ख्वप जिल्ला कचाया नायो नरेश नेवालं बागमती प्रदेशय् तकं नेवाः भाय् कामकाजी भाषा जुइधुंकूगुलिं नेपालभाषायात थःगु मातहतया लागाय् छ्यलेगु वातावरण दयेकेमाः धयादिल । ज्याझ्वलय् नेवाः देय् दबूया केन्द्रीय न्वकु खगेन्द्र श्रेष्ठं नेवाःत कर्मचारी क्षेत्रंनिसें हरेक क्षेत्रय् न्ह्याः वनेमाःगु खँय् बः बियादिल ।
भिंतुना पौ नं लःल्हायेगु ज्या जूगु उगु ज्याझ्वलय् नेवाः देय् दबूया केन्द्रीय दुजः अनिल लेकाली, स्वनिगः विशेष प्रदेशया छ्याञ्जे हरिबहादुर श्रेष्ठ, ख्वप नगर समितिया नायः कृष्ण प्रसाद प्रजापति नापं मिसा दबू व थीथी तहया प्रतिनिधिपिं सहभागी जुयादीगु खः । उगु इलय् ख्वप जिल्ला प्रशासन प्रमुख रोशनी कुमारी श्रेष्ठं समुदायया भावना कथं थः न्ह्याः वनेगु बचं बियादीगु खः ।
LEAVE YOUR COMMENTS