ने. सं. ११४४ ञलाथ्व नवमी -

जागिर नयेगु उमेर गुलि ?

१६ दँय् जागिर नकेगु प्रस्तावय् सहलह

येँ – निजामति सेवाय् प्रवेश जुइगु उमेर घटे यानाः १६ दँ यायेमाः धकाः प्रतिनिधिसभाया छुं सांसदतय्सं तःगु प्रस्तावयात देय्या उच्चपदस्थ प्रशासक व पुलांपिं प्रशासकतय्सं विरोध याःगु दु । उमिसं थुकिया बारे खुल्ला रुपं खँ मतःसां थीथी थासय् १६ दँय् निजामति जागीर नये दइगु उमेर हद पाय्छि मजुइगु सुझाव बीगु ज्या यानाच्वंगु खँ सीदुगु दु ।

सदनय् वःगु निजामति कर्मचारी सम्बन्धी छगू विधेयकय् सहलह यायेगु झ्वलय् छुं सांसदतय्सं निजामतिइ जागिर नये दइ उमेर सीमा घटे यानाः १६ दँ यायेमाःगु प्रस्ताव तःगु खः । थौंकन्हय् निजामति सेवाय् जागिर नये दइगु उमेर सीमा १८ दँ खः । १६ दँ तक मनूत किशोर अवस्थाय् हे जुइगु जुयाः उमिसं सरकारी ज्या याये मफइगु खँ पूर्व प्रशासकतय्सं धाःगु दु ।

लोकसेवा आयोगया पुलांम्ह अध्यक्ष कयोदेवी यमिं नं १६ दँय् मनूत ‘टिनेज’ हे जुइगु जुयाः अबले तक उमिके सरकारी ज्या यायेगु परिपक्वता हे मवइगु खँ कनादीगु दु ।अथे हे छुं पूर्व प्रशासकतय्सं सरकारी ज्या धइगु मेथाय् थें म्हितेगु विषय मजुइगु व थ्व गम्भीर प्रकृतिया ज्या जुइगु जुयाः १६ दँ दुपिंके थ्व ज्या यायेगु क्षमता हे मदइगु बिचाः तया हःगु दु ।

लुमंकेबहः जू, १६ दँ धइगु परिपक्व उमेर मखुगु जुयाः सरकारं सवारी साधन चले यायेगु लाइसेन्स बीगु उमेर तकं आः १६ दँया थासय् १८ दँ यायेत्यंगु दु । संघीय सरकारं थ्व सम्बन्धी व्यवस्था यायेधुंकूसां प्रदेश सरकारं धाःसा कानून मदयेकूगु जुयाः जक थ्व व्यवस्था कार्यान्वयन मजुयाच्वंगु खः ।

संसदया समितिइ नं निजामतिइ जागिरया उमेर हदया बारे चर्चा जूगु खँ सीदुगु दु । तर नेपाः लगायत थीथी अन्तर्राष्ट्रिय सन्धि सम्झौताय् १६ दँ तक मचा हे माने याइगु व उमित ज्या याकेगु धइगु बाल श्रम जुइगु जुयाः थ्व व्यवस्था गैरकानुनी समेत जुइ फइगु खँ धाःगु दु ।

अथे खःसां सदनय् थुकियात कयाः प्रस्ताव हे वयेधुंकूगु जुयाः सम्बन्धित समितिं थुकिया बारे छलफल व अध्ययन धाःसा याइगु जूगु दु । नेपाःया थीथी कानून लगायत अन्तर्राष्ट्रिय कानूनयात नं आधार दयेकाः सहलह याइगु खँ धाःगु दु ।