विश्वासया मत मवःसां देउवाया हे नेतृत्वय् न्हूगु चुनाव

येँ – सर्वोच्च अदालतया फैसला लिपा आः न्हूम्ह प्रधानमन्त्री कथं नेपाली कांग्रेसया सभापति शेरबहादुर देउवा नियुक्त जुइगु निश्चित जूगु दु । तर वय्कः प्रधानमन्त्री जुयादीसां संसदय् विश्वासया मत काये मफुत धाःसा छु जुइ ?

एमाले दुने म्हीग बहनी नेतातय् दथुइ सहमति जूगु कारणं माधव नेपाल पक्षया २३ म्ह सांसदतय्सं आः देउवायात भोट बीत नैतिक समस्या वइगु खनेदु । उकिं आः माधव नेपाल पक्षया नेतातय्सं देउवाया नेतृत्वय् फुक्क हे पार्टी दुथ्याःगु राष्ट्रिय सरकार गठन यानाः न्ह्याः वनेगु प्रस्ताव न्ह्यःने हयाच्वंगु दु । देउवां नं आः माल धाःसा फुकसित हे कःघानाः न्ह्याः वनेगु मनःस्थिति दयेकाच्वंगु खँ धाःगु दु ।

छुं जुयाः नेपाल पक्षया २३ म्ह सांसदतय्सं भोट बी मखन धाःसा देउवां नं विश्वासया मत काये खनी मखु । तर संविधानया व्यवस्था कथं यदि देउवां विश्वासया मत काये मफुसां वय्कलं राजीनामा बीमाःगु अवस्था धाःसा दइ मखु । वयां लिपा वय्कःया हे नेतृत्वय् चुनावय् वने मालीगु जुइ । देउवा कामचलाउ सरकार जू वनी । संविधानया धारा ७६ (५) कथंं वःम्ह प्रधानमन्त्रीं नं विश्वासया मत काये मखन धाःसा हानं धारा ७६(२) पाखे लिहां वनेगु प्रावधान संविधानय् तयातःगु मदु ।

न्हूगु सरकार गठनयात कयाः म्हिगःनिसें हे विपक्षी पार्टीया नेतातय् दथुइ खँल्हाबल्हा शुरु जुइधुंकूगु दु ।