अस्टे्लियाय् लकडाउन कार्यान्वयन याकेत सेना परिचालन

एजेन्सी- अस्टे्लियाया सिड्नीइ सरकारं थप याःगु लछिया लकडाउन पालना याकेत सेना परिचालन याःगु दु । वंगु जुननिसें अस्टे«लियाय् कोरोना भाइरसया डेल्टा भेरियन्टया संक्रमण अप्वःगु खःसा संक्रमणयात म्हो यायेत लकडाउन कडा यायेगु झ्वलय् सिड्नीइ सलंसः सेना परिचालन याःगु खः ।

अन्तर्राष्ट्रिय सञ्चार माध्यमं बिउगु जानकारीकथं कोरोना संक्रमण थहां वनाच्वंगु थासय् सेनां प्रहरीयात ग्वाहालि याइ । न्यू साउथ वेल्सया प्रहरी मन्त्री डेभिड एलिओटं धाःकथं सिड्नीइ दुपिं छुं छुं मनूतय्सं लकडाउनया पालना मयाःगुलिं सेना परिचालन यायेमाःगु धाःगु दु । लकडाउनया इलय् पसः वनेगु, वासः याकः वनेगु व अत्यावश्यक ज्या बाहेक पिहां वयेगु अनुमति मदु ।

सिड्नीइ शुक्रवाः १७० म्ह न्हूपिं संक्रमित खनेदुगु खः । वंगु जुननिसें आःतकया दुने सिड्नीइ स्वद्वलं मल्याक कोरोना संक्रमित खनेदुगु दुसा गुम्ह सीगु दु ।

सेना परिचालन याःगुलिं मनूतय्सं विरोध नं याःगु दु । अस्टे«लियाया वकीलतय्गु संगठनं सेना परिचालनयात उदार लोकतन्त्रय् सशस्त्र फौजया चिन्ताजनक छ्यलाबुला धाःगु दु । न्हि खानाः न्हि नयेमाःपिं व गरिबतय्त लकडाउनं दुःख जुयाच्वंबलय् सेना परिचालन यानाः इमित झन् दुःख बिउगु नगरप्रमुख स्टीभ क्रिस्टाें धाःगु दु ।

सम्बन्धित बुखँ

LEAVE YOUR COMMENTS