भारतय् माग ३ निसें खोप बीगु

एजेन्सी – भारतय् वइगु माग ३ गते शनिवाः निसें कोरोना भाइरसविरुद्ध खोप बीगु सुरु याइगु जूगु दु । प्रधानमन्त्री नरेन्द्र मोदीं खोप अभियानयात छगू महत्वपूर्ण पलाः धासें वइगु जुलाई महिना दुने ३० करोड भारतीयतय्त खोप बीगु खँ धाःगु दु। भारतय् थौंकन्हय् १ अर्ब ३० करोड जनसंख्या दु । प्रधानमन्त्री मोदीं स्वास्थ्य सेवाया कर्मचारी व कोरोना भाइरसविरुद्ध अग्रपंक्तिइ ज्या यानाच्वंपिंत न्हापां खोप बीगु खँ धयादीगु दु ।

भारत अमेरिका धुंकाः दकलय् अप्वः संक्रमित दुगु देय् खः । थन १० करोड ३० लाखं मल्याक मनूतय्त कोरोना संक्रमण पुष्टि जुइधुंकूगु दुसा छगूत्या लाखं मल्याक मनूत सीधुंकूगु दु । भारतया नियामक निकायं आः निगू खोपयात छ्यलेगु अनुमति बीधुंकूगु दु। उकी मध्ये कोभिशील नांया खोप एस्ट्राजेनेकां अक्सफोर्ड विश्वविद्यालयलिसे जानाः दयेकूगु खःसा कोभ्याक्सिन नांया खोप भारतीय कम्पनी बायोटेकं दयेकूगु खः । सरकारं धाःकथं ५० दँ स्वयां च्वय्यापिं व ५० दँ स्वयां क्वय् यापिं स्वास्थ्य समस्या दुपिं न्ह्याम्हेसित नं थ्व खोप बी । थ्व खोप अभियानया निंतिं थौंकन्हय् भारतया थीथी थासय् अभ्यास जुयाच्वंगु दु । थुकिया निंतिं ७०० गू जिल्लाय् छगूत्यालाख स्वास्थ्यकःमितय्त खोपया तालिम बियाचच्ंगु दु ।

मेखे परीक्षण हे पूमवंकुसे सरकारं कोभ्याक्सिनयात आपतकालिन अनुमति बिउगु धकाः विज्ञतय्सं सरकारया आलोचना नं यानाच्वंगुदु । अल इन्डिया ड्रग एक्सन नेटवर्क नांया छगू संस्थां थ्व खोप प्रभावकारी खः धयागु पुष्टि याइगु गाक्क तथ्यांक मवःनिगु व पादर्शिताया नं अभाव दुगु धकाः अनुमति बिउगु खँय् हे न्ह्यसः थनाच्वंगु दु ।

सम्बन्धित बुखँ

LEAVE YOUR COMMENTS