‘विश्व नेवाः दिवस ताःलाके नु’
दया शाक्य, (संयोजक), विश्व नेवाः दिवस
विश्व नेवाः दिवस वास्तवय् छु खः ?
– विश्व नेवाः दिवसया अवधारणा वंगु सन् २०१६ मार्च २५ निसें २७ तक जूगु विश्व नेवाः संगठन (डब्ल्युएनओ)या निक्वःगु महाअधिवेशनं निर्वाचित न्हूगु ज्यासना पुचःया लय्पतिकं जुइगु मुँज्याय् विश्वय् नेवाःत सु खः ? धकाः म्हसीका बीमाःगु खँ न्ह्यःने वःगु खः । थ्व हे झ्वलय् वंगु २०१६ जुलाई महिनापाखे च्वंगु मुँज्यां क्वःछिउकथं हलिं नेवाः दिवस (World Newah Day) या हलिं नेवाः नखः हनेगु घोषणा जूगु खः । थ्व दिवस मार्च महिनाया लिपांगु शनिवाः दँय्दसं विश्वन्यंकं हनेगु जुइ । थुकियात निरन्तरता बीत डब्ल्युएनओं आह्वान नं याःगु दु ।
छाय् हने त्यनागु ?
– थ्व दिवस हनेगुया मू आज्जु धइगु हे नेपाः देय् नाप सतिक स्वापू दुपिं नेवाःतय्सं विश्वया सम्पदानाप म्हसीका बीगु खः ।
विश्व नेवाः संगठन (डब्ल्युएनओ)या निक्वःगु महाअधिवेशनं निर्वाचित न्हूगु ज्यासना पुचःया लय्पतिकं जुइगु मुँज्याय् विश्वय् नेवाःत सु खः ? धकाः म्हसीका बीमाःगु खँ न्ह्यःने वःगु खः ।
उपलब्धी छु जुइ ?
– थ्व दिवस हनाः विश्वन्यंकंया कुंकुलामय् च्वंपिं नेवाःतय् नागरिकया नां, नेवाः म्हसीका (पहिचान)यात ल्यंका तयेगु जुइ । थौंकन्हय्या नेवाः मस्त झीपिं नेवाः खः धाये मसया वनाच्वंगुयात तीव्र रुपं पनाः न्ह्यलं चायेके बीगु जुइ । देश विदेशय् जन्म जुयाः ब्वलंपिं मस्त ल्याय्म्ह ल्यासे नेवाः जुइ मसया वःगु दु । इमित न्हू न्हूगु प्रविधि छ्यलाः थः सु धइगु बारे शिक्षादीक्षा बीगु ज्याय् हःपाः बीगु खः । थ्व हाकनं नेवाः नखः हनेगुया बिस्कंगु आज्जु जुयाच्वनी ।
नेवाः एकता दिवस लिसे थ्व छु पाः ?
– नेवाः समाजय् खने दयाच्वंगु तःताजि दिवस मध्ये सन् २०१० पाखे दशरथ रंगशालाय् जूगु विराट नेवाः मुनायात लुमंकेकथं गुगु नेवाः एकता दिवस हनेगु यानाच्वंगु खः, थ्वहे एकतायात लुमंके कथं देय् त्वःताः पिहां वनेधुंकूपिं थौं थःपिं च्वंच्वनागु सहर, देशय् थम्हं फुगुचाःगु ज्याझ्वः यानाः नेवाः म्हसीका स्थानीय वासिन्दातय्त परिचय बीगु व इमिगु ज्ञानया भण्डारय् नेवाः सभ्यता दुकायेगुकथं थ्व विश्व नेवाः दिवस हनेगु जुइ । विश्वय् खने दयाच्वंगु थीथी सभ्यता मध्ये नेवाः सभ्यता नं छगू खः धकाः म्हसीके बीगु ज्याय् थ्व दिवस हनाया लिच्वः जुइफु ।
दिवस हनेगु तयारी गथे जुयाच्वन ?
– तयारीया झ्वलय् अक्टोबरपाखे विज्ञप्ति पिकयाः सम्मेलनया मू आज्जु ताःलाकेत छगू सम्मेलन यायेगु तातुनाः मार्च ३०–३१ निन्हुयंकं जूगु खँ पित बीधुंगु दु । थुकियात ल्वःगु ज्यापौ न्ह्यब्वयेत नोभेम्बर ३ तारिख तकया दुने मूति÷सारछ्वया हयेत इनाप यानाकथं आःतकया दुने २० गू दुतिने धुंकूगु दु । अले वंगु जनवरीया १ तारिख तकया दुने मूति पौ स्वीकृति जूगु सुचं सकसितं बी धुंकूगु दु । आः ३१ तारिख तकया दुने ज्यापौ थ्यंकेमाःगु सुचं नं बी धुंकूगु दु । इमिसं ज्यापौ छ्वया हयाः सम्मेलनय् न्ह्यब्वयेत २० मिनेट ई बियाः न्हापां ब्वनेमाःगु खँ सुचं फुक्कं बीधुंकूगु दु । दुहां वःगु ज्यापौ नेवाः भाषा, संस्कृति, कला, साहित्य, सामाजिक संजाल, पत्रकारिता, संकिपा, पहिचान, भाय् स्यनेगु, राजनीति आदि आदि विषययात कःघानाः ज्यापौ न्ह्यब्वयेमाःगु क्वःछिनातःगु दु ।
सम्मेलन जुइगु थाय् ल्ययेगु सिधये धुंकूगु दु । मूपाहां, मू न्वचु बीम्ह ल्यये मानि । ई सतिना वःलिसे ज्या तिप्यना वनी धकाः विश्वास कया । थ्व ज्या मुक्कं ताःलाकेत गुम्ह दुजः दुगु छगू ज्यासना पुचः नीस्वंगु दु । थुकिया संयोजक डब्ल्युएनओया वरिष्ठ न्वकु दयारत्न शाक्ययात ल्यःगु दु । दुजलय् डा. नारायण राजभण्डारी (अमेरिका), संयुक्त श्रेष्ठ (युके), कृष्ण चखुं (बड्डलादेश), रश्मिला प्रजापति (नेपाः), शाक्य सुरेन (नेपाः), अनार वज्राचार्य (नेपाः), श्रीजना प्रधान (नेपाः), किरणकेन रंजित (नेपाः) व विमलमान श्रेष्ठ (क्यानडा) ।
ज्याझ्वलय् छु छु जुइ ?
– न्हापांगु न्हिया ज्याझ्वः उलेज्या सुथसिया १२ ताः तकया दुने सिधयेकेगु । ज्यःनाः धुंकाः न्हिछियंकं ज्यापौ न्ह्यब्वयेगु अले तुच्चा यानाः क्वचायेकेगु । निन्हुया न्हिकुन्हु सुथंनिसें ज्यापौ न्ह्यब्वयेगु व विस्तृत सहलह यानाः नेवाः दिवसयात तिबः बीगु, बहनी नेवाः भ्वय् यायेगु । उकी गन्यमान्यपिं पाहांकथं सःतेगु जुइ । छगू विशेष कथंया नेवाः नखः हनाः नेवाः म्हसीका नापं नेवाः सभ्यतायात तिबः जुइकथं विश्वय् आह्वान यायेगु जुइ ।
गुलि मनुखं ब्वति काइ ? गन गन देशं वइ ?
– निसःति मनूतय्सं ब्वति काइगु आःतकया अनुमान दु । आःतकया दुने अमेरिका, युके, क्यानाडा, जापान, भारत, थाइल्याण्ड, संयुक्त अरब इमिरेट्स, कतार, हङकङ आदि देशं ब्वति काइगु जुइधुंकूगु दु । नेपालं नं थीथी संघसंस्थाया प्रतिनिधिं ब्वति काइ ।
ज्यापौ छु छु वइ ?
– ज्यापौया विषयस जिं च्वय् हे न्ह्यथने धुंगु दु । उकिं थ्व सम्बन्धय् मेगु धयाच्वने माली मखु ।
थुकी नपाःया नेवाःतय्सं गुकथं ब्वति कायेफइ ?
– थुकी ब्वति कायेत ‘ओपन टु अल रेजिष्ट्रेशन फी’ पुलाः ब्वति काये फइ । रेजिष्ट्रेशनय् निश्चित अवधि तोके यानाः डिस्काउन्ट रेट नं तयातःगु दइ । अनलाइन मार्फत रजिष्ट्रेशन फाराम भरे याये फइ ।
छुं सार्वजनिक आव्हान याये माःगु दु कि ?
– झी सकलें जानाः ‘वल्र्ड नेवाः दिवस’ सफल याये नु । थ्व छगू विशुद्ध प्राज्ञिक सम्मेलन जुइ ।
LEAVE YOUR COMMENTS