मेलम्चीया लः वितरणयात कयाः जनप्रतिनिधिलिसे सार्वजनिक सुनुवाई

किपू-  किपुलिइ त्वनेगु लःया व्यवस्थापनयात कयाः किपू नगरपालिकाया जनप्रतिनिधितलिसें सार्वजनिक सुनुवाई ज्याझ्वः जूगु दु । काठमाडौं उपत्यका खानेपानी लिमिटेड (केयुकेएल) व सरसफाइ आयोजना अन्तर्गत किपू नगरपालिकाया न्यागू वडाया जनप्रतिनिधि दथुइ उगु सार्वजनिक सुनुवाई ज्याझ्वः जूगु खः ।

किपू नगरपालिका वडा नं. १, २, ३, ९ व १०य् मेलम्ची खानेपानी आयोजनाया पाइप लायेगु व हिति जडान यायेगु ज्याया कार्यान्वयनया निंतिं प्रारम्भिक वातावरणीय परीक्षण यायेगु सन्दर्भय् वंगु शुक्रवाः उगु सार्वजनिक सुनुवाई ज्याझ्वः जूगु खः ।

किपू नगरपालिकाया प्रमुख रमेश महर्जनया सभापतित्वय् किपू नगरया डाँडायात लक्षित यानाः उगु सार्वजनिक सुनुवाई ज्याझ्वः जूगु खः । ज्याझ्वलय् किपू नगरपालिकाया सम्बन्धित वडाय् मेलम्चीया लः वितरणया निंतिं पाइप लायेगु, हिति वितरण यायेबलय् जुइ फइगु सम्भावित वातावरणीय प्रभाव लगायतया विषयय् सहलह जूगु खः । उगु इलय् आयोजनाया प्राविधिक पक्षया प्रतिवेदन तकं न्ह्यब्वयेगु ज्या जूगु खः ।

सहलहया इलय् प्रारम्भिक वातावरणीय परीक्षणया निंतिं किपू नगरपालिका, वडा ज्याकू, केयुकेएलपाखें आवश्यक राय, सल्लाह, सुझाव संकलन यायेगु प्राप्त राय सल्लाह, सुझावयात वातावरणीय परीक्षणय् समावेश याइगु जूगु दु ।

सहलह ज्याझ्वलय् किपू नगरपालिकाया उपप्रमुख सरस्वति खड्का, किपू देय्या डाँडायात प्रतिनिधित्व याइगु वडा १ या वडाअध्यक्ष हर्ष महर्जन, २ वडाअध्यक्ष रमेशमान डंगोल, ३ वडाअध्यक्ष राजेन्द्र महर्जन, ९ वडाअध्यक्ष गंगाराम महर्जन व १० वडाअध्यक्ष अमन महर्जनलिसें केयुकएल किपू शाखा प्रमुख मिलन थापा, आयोजना कार्यान्वयन निर्देशनालय, एशियाली विकास बैंक (एडीबी), समाजशास्त्री, कन्सल्ट्यान्टया पदाधिकारी लगायतया उपस्थिति दुगु खः ।

सम्बन्धित बुखँ

LEAVE YOUR COMMENTS