घुस काण्डया न्यायाधीश निलम्बनय्

येँ – घुस काण्डय् दुथ्याःम्ह येँ जिल्ला अदालतया न्यायाधीश राजकुमार कोइराला निलम्बित जूगु दु । न्यायाधीश कोइराला व अधिवक्ता रुद्र पोखरेल दथुइ इच्छाराज तामाङया मुद्दाया विषययात कयाः जूगु घुस बार्गेनिङया अडियो पिहां वयेवं न्यायपरिषदया बैठकं छानविन समिति नीस्वंगु खः ।

छानविन समिति नीस्वंगु बारेया सुचं म्हिगः राजपत्रय् पिहां वयेवं न्यायाधीश कोइराला निलम्बनय् लाःगु खः । राजपत्रय् पिहां वःगु सुचनय् न्यायाधीश कोइराला व अधिवक्ता पोखरेल दथुइ जूगु धाःगु टेलिफोन संवाद व उकिया लिसे सम्बद्ध तथ्यया सम्बन्धय् कोइरालां आचरण व कर्तव्यया इमान्दारिपूर्वक पालना मयाःगु विषयय् छानविन यायेत समिति दयेकूगु खँ न्ह्यथनातःगु दु ।

न्याय परिषदया दुजः रामप्रसाद श्रेष्ठया अध्यक्षताय् नीस्वंगु समितिं न्याय परिषद ऐन, २०७३ कथं जाँचबुझ यानाः ज्या न्ह्याकूगु तिथिं पीन्यान्हुया दुने प्रतिवेदन पेश यायेमाः । उगु ईया दुने प्रतिवेदन पेश यायेमफइगु अवस्था वल धाःसा परिषदं ई थप यायेफइगु व्यवस्था दु । समितिइ उच्च अदालत यलया कायममुकायम मू न्यायाधीश महेशप्रसाद पुडासैनी व उच्च अदालत यलया न्यायाधीश महेश शर्मा पौडेल दुजः कथं दु ।

सम्बन्धित बुखँ

LEAVE YOUR COMMENTS