सर्वोच्च कमान्डर सिंहया १०५ क्वःगु जन्मजयन्ती

येँ – न्हापांगु जनआन्दोलनया सर्वोच्च कमान्डरलिसें लौहपुरुष गणेशमान सिंहया १०५ क्वःगु जन्मजयन्तीया लसताय् वय्कःया झ्वाताय् माल्यार्पण याःगु दु । २०४६ सालया जनआन्दोलनया सर्वोच्च कमान्डर सिंहया जन्मजयन्तीया लसताय् नेपाली कांग्रेस येँ जिल्ला व गणेशमान सिंह फाउण्डेसनया ग्वसालय् उगु ज्याझ्वः जूगु खः ।

थनया शोभाभगवतीइ च्वंगु मदुम्ह सर्वोच्च नेता सिंहया झ्वाताय् माल्यार्पण ज्याझ्वः जूगु खः । थ्व हे झ्वलय् नेपाली कांग्रेसया सभापति शेरबहादुर देउवां नेपाःया लोकतान्त्रिक आन्दोलनया अथक योद्धालिसें जनआन्दोलनया सर्वोच्च नेता गणेशमान सिंहया योगदान गबलें नं ल्वःमंके फइमखु धयादीगु दु ।

लौहपुरुष सिंहया १०५क्वःगु जन्मजयन्तीया लसताय् छगू विज्ञप्ती जारी यासें कांग्रेस सभापति देउवां राष्ट्रिय राजनीतिइ लौहपुरुषया नामं म्हसिउम्ह नापं अन्तर्राष्ट्रिय जगतया राजनीतिइ तकं प्रभावशाली नेताया रुपय् थःत स्थापित यायेत सफल जुयादीम्ह मदुम्ह नेता सिंहया त्याग, तपस्या व निष्ठायात भावी पुस्तां नं सम्मान याइ धयातःगु दु ।