चिनियाँ राजदूतया धापू विवादय्

येँ (नेपालभाषा टाइम्स)- प्रधानमन्त्री पुष्पकमल दाहाल चीन भ्रमणय् वनेत्यंगु इलय् लाक्क नेपाःया लागिं चिनियाँ राजदूत छन सङं नेपाः–भारत व्यापार सम्बन्धय् बियादीगु अभिव्यक्ति विवादय् लाःगु दु ।

राजदूत सङया उगु अभिव्यक्तियात कयाः वय्कःयाके स्पष्टीकरण कायेमाः धकाः समेत परराष्ट्र मन्त्रालययात संसदीय समितिं निर्देशन बिउगु दु । म्हिगः अन्तर्राष्ट्रिय सम्बन्ध तथा पर्यटन समितिं थ्व बारे नं परराष्ट्र मन्त्री साउदयाके न्यनेकने याःगु खः ।

बैठकय् समितिया आपालं सांसदतय्सं चिनियाँ राजदूतया धापूयात कयाः विरोध याःगु खः । समितिया सभापति राजकिशोर सादवं थुकिया बारे राजदूतयात सचेत याकेत निर्देशन बियादीगु खः । लिसलय् मन्त्री साउदं उगु इलय् थः स्वनिगलं पिने लानाच्वंगुलिं थुकिया बारे थःके जानकारी मदु धकाः लिसः बियादीगु खः ।

वंगु शनिवाः फाउन्डेशन अफ ट्रान्स हिमालयन रिसर्च एन्ड स्टडिजं याःगु छगू ज्याझ्वलय् न्ववासें राजदूत सङं नेपालं न्ह्याबलें नं भारतयात बिजुली मियाः धनी जुइ धकाः बिचाः यानाच्वनी, तर नेपालं भारतयात बिजुली मीगु सिबें नं भारतपाखें अप्वः बिजुली न्यानाः व्यापार घाटा यानाच्वंगु दु धयादीगु खः । चीन व भारतं छगू हे इलय् खुल्ला अर्थतन्त्र नाला काःगु खःसां चीन गतिशील जुयाः थौं विकास यानाच्वंगु दुसा भारतय् विकासया लिच्वः नकतिनि खने दयाच्वन धकाः नं न्ववानादीगु खः ।

‘चुच्चे नक्सा’ या जानकारी मदु
परराष्ट्र मन्त्री एनपी साउदं कालापानी, लिपुलेक व लिम्पियाधुरा दुथ्याकाः नेपालं तयार याःगु ‘चुच्चे नक्सा’ बारे चीनयात जानकारी याकूगु रेकर्ड मलूगु खँ धयादीगु दु । वंगु २०७७ जेठ ७ गते जारी याःगु न्हूगु नक्सायात प्रतिनिधिसभां जेठ ३१ गते सर्वसम्मतिं पारित यानाः संविधानया अनुसूचीइ तयेधुंकाः चीनयात उकिया बारे पत्राचार याःगु पौ मलूगु खँ मन्त्री साउदं धयादीगु खः ।

प्रतिनिधिसभा अन्तर्राष्ट्रिय सम्बन्ध व पर्यटन समितिया म्हिगःया बैठकय् मन्त्री साउदं मन्त्रालयया सम्बन्धित महाशाखाय् मालेगु झ्वलय् पत्राचारया रेकर्ड मलुगु खँ धयादीगु खः । नेपालं उगु नक्सा जारी याःगु इलय् एमालेया प्रदिप ज्ञवाली परराष्ट्र मन्त्री जुयाच्वंगु खः ।

नेपालं अज्याःगु नक्सा जारी याःगु बारे मेगु राष्ट्रयात जानकारी याकूगु दु कि मदु धकाः न्यनेत परराष्ट्र मन्त्री साउदयात समितिं सःतूगु खः । तत्कालीन परराष्ट्र मन्त्री ज्ञवालीं पत्राचार यानागु दु धकाः याःगु दाबी बारे नं संसदीय समितिइ न्ह्यसः थंगु खः ।

थ्वहे झ्वलय् पुलांम्ह प्रधानमन्त्रीं लिसे नेकपा एकीकृत समाजवादीया अध्यक्ष माधव नेपालं तत्कालीन परराष्ट्र मन्त्री ज्ञवालीं चीनयात नक्साया बारे लिखित जानकारी याकूगु खः लाकि मौखिक जानकारी याकूगु खः धकाः नं न्ह्यसः तयादीगु दु ।