ने. सं. ११४४ कौलाथ्व षष्ठी -

गुथि प्रशासक शाक्ययात पत्रकार दबूपाखें भिंतुना देछा

येँ- गुथि संस्थानया केन्द्रीय प्रशासक किरण शाक्यं संस्थानयात सरोकारमैत्री दयेकेगु निंतिं कुतः यायेगु खँ धयादीगु दु । प्रशासक शाक्यं गुथि संस्थानयात सरोकारवालामैत्री दयेकेगु निंतिं उच्च प्राथमिकताय् तयागु नं धयादीगु दु ।

नेवाः पत्रकार राष्ट्रिय दबू पाखें संस्थानया केन्द्रीय प्रशासक शाक्यया कार्यकाल सफलताया कामना यासे भिंतुना देछाःगु झ्वलय् उगु खँ धयादीगु खः । दबूया केन्द्रीय कानुनी सल्लाहकारतकं जुयाच्वनादीम्ह प्रशासक शाक्ययात त्रिपुरेश्वरस्थित संस्थानया केन्द्रीय ज्याकुथिइ वनाः दबूया पदाधिकारीपाखें भिंतुना देछाःगु खः ।

वंगु जेठ २० गतेया मन्त्रि परिषद्या बैठकं वय्कःयात संस्थानया केन्द्रीय प्रशासक नियुक्त यायेगु निर्णय याःगु खःसा असार ८ गते वय्कलं पदभार ग्रहण यानादीगु खः ।

उगु इलय् वय्कलं थीथी जात्रा, पर्व, संस्कृतिलिसे स्वानाच्वंपिं गुथियार व सरोकारवालातय् संस्थानप्रति आपालं असन्तुष्टि व गुनासो दुगु धासें गुथिया विद्यमान ऐन, संरचनाया दायराय् च्वनाः असन्तुष्ट पक्षयात खँयात संबोधन यायेगु निंतिं थम्हं कुतः यायेगु जुइ धयादिल ।
जात्रा, पर्व न्यायेकेत संस्थानं बिया वयाच्वंगु खर्च ईकथं अप्वयेका यंकेगु निंतिं थम्हं कुतः यायेगु जुइ धासें प्रशासक शाक्यं न्हापा बिया वयाच्वंगु खर्च स्वयां थुगुसीइ छुं अप्वयेकेगु निंतिं कुतः यायेगु जुइ धयादिल । लिसें वय्कलं स्वनिगःया जात्रा, पर्व, संस्कृतिलिसे स्वानाच्वंगु अमूत संस्कृति, सम्पदा संरक्षणया निंतिं थ्व सम्बन्धी भिडियो निर्माण यायेगु नं थःगु कार्यसूची दुगु वय्कलं जानकारी बियादिल ।

उगु इलय् दबूया केन्द्रीय नायः सुरजवीर वज्राचार्य, न्वकु नृपेन्द्रलाल श्रेष्ठ, रचना मूछ्याञ्जे सुनिल महर्जन छ्यांजे केके मानन्धर लगायतं गुथि सम्बन्धी समस्या, आन्दोलनकारीतय् माग लगायतया विषययात कयाः जिज्ञासा तयादीगु खः ।