मंकाः खलःया दबूछेँ दनेगु ज्या न्ह्यात

येँ – नेपालभाषा मंकाः खलःया दबूछेँ दनेगु ज्या म्हिगःनिसें न्ह्याःगु दु । म्हिगः ठेकेदार कम्पनीया डोजर हयाः अन गाः म्हुइगु ज्या याःगु खः । मंकाः खलःया छेँ दनेगु लागिं छुं ई न्ह्यः हे जग स्वनेगु ज्या जूगु खःसां कोभिड–१९ महामारी व लकडाउनं यानाः ज्या शुरु याये मफुगु खः । छुं ई दिनाच्वंगु ज्या म्हिगःनिसें हानं शुरु जूगु खः ।

येँ महानगरपालिकाया आर्थिक ग्वाहालिं मंकाः खलःया थुगु दबूछेँ दनेगु ज्या जूगु खः । मनपाया प्रमुख विद्यासुन्दर शाक्यं हे मंकाः खलःया जग स्वनादीगु खः । थ्व दबूछेँया निर्माण ज्या भाजु शाक्यया हे कार्यकालय् क्वचायेकेगु ताः तयाः निर्माण जुयाच्वंगु खँ धाःगु दु । म्हिगःनिसें ज्या शुरु याःम्ह ठेकेदार कम्पनीं नं दबूछेँ निर्माण मेयर शाक्यया हे कार्यकालय् सम्पन्न याना बी धकाः बचं बिउगु खँ सीदुगु दु ।

नेपालभाषा मंकाः खलःया दबूछेँ निर्माण नेवाः आन्दोलनया हे छगू मू माग जुयाच्वंगु खःसा थुकियात नेवाःतय्सं थःपिनि म्हगसया रुपय् समेत स्वयेगु याना वयाच्वंगु दु । थुगुुसी येँ महानगरपालिकां थ्व म्हगस पूवंकेगु ज्या याना बीत्यंगु खः । दबूछेँ दनेगु हे सन्दर्भय् मंकाः खलः न्हूधाः यानाः जनकवि दुर्गालाल श्रेष्ठया अध्यक्षताय् न्हूगु ज्यासना पुचः ल्ययेगु ज्या जूगु खः ।