नेवाः देय् दबू किपू नगरया न्हापांगु अधिवेशन

किपू – नेवाः देय् दबू किपू नगर कमिटीया न्हापांगु अधिवेशन वंगु शनिवाः जुल । किपू नगरया हे गाम्चा (भण्डारपुर)य् अधिवेशन जूगु खः ।
अधिवेशन स्वयां न्ह्यः ४ वडाया विष्णुदेवी देगः परिसरय् मुनाः सांस्कृतिक बाजं, झाँकी व नेवाः ध्वाँय्सहित नगर परिक्रमा याःगु खः ।

देय् दबूया केन्द्रीय नायः नरेश ताम्राकारं त्वाःदेवाय् मत च्याकाः उलेज्या यानादीगु अधिवेशनय् किपू नगर समितिया न्वकु नरेश श्रेष्ठं लसकुस यानादीगु खः ।

विशेष पाहांकथं झायादीम्ह किपू नगरपालिकाया प्रमुख रमेश महर्जनं देय् दबुलिं नेवाःतय् निंतिं ज्या यायेमाःगु खँय् बः बियादिसें दबूया नेतृत्व याइपिं राजनीतिक दलया कार्यकर्ता मजूसा बांलाइगु विचाः तयादिल ।

अथे हे पाहांकथं झायादीम्ह उपप्रमुख सरस्वती खड्कां थःपिं निर्वाचित जुया वयेधुंकाः नगरय् नेवाः समाजलिसें भाषा, कला, संस्कृतिया ख्यलय् ज्वःमदुगु ज्या यानागु खँ कनादिल ।

मूपाहां देय् दबूया नायः नरेश ताम्राकारं देय् दबूया इतिहासनिसें वर्तमान अवस्थातकया बारे खँ कुलादिसें किपू नगरसमितिया ज्या च्वछायेबह जूगु विचाः प्वंकादिल ।

ज्याझ्वलय् दबूया बागमति प्रदेश नायः उमेश स्थापित, येँ जिल्ला नायः मचाराजा महर्जन, किपू नगर समितिया सल्लाहकार श्रीकृष्ण महर्जनं भिंतुना न्वचु बियादीगु खः ।

अधिवेशनया निगूगु सत्रं नगर समितिया न्हूगु ज्यासना पुचः नं ल्यःगु खः। न्हूगु ज्यासना पुचलय् बुद्धिलाल ज्यापु नायः,केशव महर्जन न्वकु, शर्मिला जोशी मिसा न्वकु, रामचन्द्र डंगोल न्वकु, विनेश श्रेष्ठ छ्याञ्जे व दिलकुमारी महर्जनयात दांभरिं ल्यःगु दु ।

अथे हे दुजलय् राधेश्याम महर्जन (गाम्चा), अर्जुन महर्जन, राजकुमारी महर्जन, चन्दुर महर्जन, मिर्दुराज श्रेष्ठ, मिश्रीमाया महर्जन, सरलगोपाल महर्जन, रत्नशोभ महर्जन, राधेश्याम महर्जन (भुतखेल), शिवराम महर्जन, थिके महर्जन, विना श्रेष्ठ, तीर्थ माली, लक्ष्मीनानी महर्जन व तविलाल महर्जनयात ल्यःगु दु ।