नेपालभाषा छधाः प्याखं ब्वज्या

किपू- ताः ई तक दिनाच्वंगु दबू प्याखंयात आः हाकनं निरन्तरता बिइगु झ्वलय् म्हिगः किपूया राराहिल स्कूलया थियटरय् नेपालभाषा छधाः प्याखं ब्वज्या जुल । कासा कथं हे थुगु ज्याझ्वः ग्वसाः ग्वयेगु ताः तःगु खःसां लकडाउनया कारणं नेपालभाषा एकेडेमीं थुगु ज्याझ्वः ब्वज्या कथं जक याःगु खः । ब्वज्याया उलेज्या नेपालभाषा एकेडेमीया संरक्षक शताब्दीपुरुष सत्यमोहन जोशीं त्वाः देवाय् मतच्याका यानादीगु खः ।

ज्याझ्वःया उलेज्या यानादिसें मूपाहां जोशीं नेपालमण्डलय् हुलाप्याखं व खँल्हाबल्हा प्याखंया परम्परा ताः ईनिसें न्ह्यानाच्वंगु कनादिल । ‘मल्लकालय् आपालं नाटक प्रस्तुत जूगु खःसां छुं ई न्ह्यःनिसें दबूप्याखंया परम्परा हे न्हना वनेत्यंगु खँयात ध्यानय् तयाः मनूतय्त लय्तायेक सुखी यायेगु उद्देश्यं न्ह्यब्वःगु थ्व प्याखं नं छगू सम्पदा खः धयादिल ।

ब्वज्याय् न्ह्यब्वःगु च्यापु प्याखंयात नेपाः च्यानल टेलिभिजन मार्फत् प्रत्यक्ष प्रशारण याःगु खः । ब्वज्याय् मीना वज्राचार्यं च्वयादीगु, पवन जोशीं निर्देशन यानादीगुु लिथु, लोककवि राजभाई जकःमिं च्वयादीगु, रामकृष्ण खड्गीं निर्देशन यानादीगु कीर्तिलक्ष्मी, शशीकला मानन्धरं च्वयादीगु, आर्यम नकःमिं निर्देशन यानादीगु चन्द्रहार, कृष्ण प्रजापतिं च्वयाः निर्देशन यानादीगु बुँख्याचा, सुरेन्द्र तुलाधरं च्वयाः निर्देशन यानादीगु डा. कान्छाभाई, राजु स्यस्यःनं च्वयाः निर्देशन यानादीगु तरकारि बञ्जा, राजेन्द्रकुमार पुतां च्वयादीगु व रवि महर्जनं निर्देशन यानादीगु थौंकन्हय्, रामकृष्णं धिनां च्वयादीगु राजेश शाक्यं निर्देशन यानादीगु थ्वपु कर्म न्ह्यब्वःगु खः ।