ने. सं. ११४३ तछलाथ्व त्रयोदशी -

भिंद्यःया देगः पुनःनिर्माण लिपांगु चरणय्

यल- थनया भिंद्यःया देगः पुनःनिर्माणया ज्या लिपांगु चरणय् थ्यंगु दु । यल लाय्कू लागाया भिंद्यःया देगः पुनःनिर्माणया झ्वलय् ९० प्रतिशत ज्या क्वचायेधुंकूगु दु ।
२०७२ बैशाख १२ गोरखाया बारपाक केन्द्रविन्दु जुयाः ब्वःगु भुखाचय् लानाः देगः क्षति जूगु खः । भारत सरकारं उगु देगः पुनःनिर्माणया निंतिं जिम्मा काःगु खःसां दँदँ तक पुनःनिर्माण यायेगु खँय् चिउताः मक्यनेवं स्थानीयतय्सं उपभोक्ता समिति गठन यानाः देगः पुनःनिर्माण याःगु खः ।

२०७२ सालया विनाशकारी भुखाचं उगु ऐतिहासिक देगःया च्वय्या तल्लाय् बांमलाक क्षति याःगु खः । भुखाचं देगःया च्वय्या तल्लाय् बांमलाक क्षति याःसां क्वथ्यंकं क्षति जुइवं पुनःनिर्माण याःगु खः ।

पुनःनिर्माणया लिपांगु चरणय् थ्यंगु देगःया आः पल्लिं चिइगु ज्या जुयाच्वगु दु । देगःया अंगया ज्या क्वचायेधुंकूगु दुसा व आः पल्लिं चिइगु ज्या जुयाच्वंगु देगः पुनःनिर्माण उपभोक्ता समितिया अध्यक्षलिसें ललितपुर उद्योग वाणिज्य संघया निवर्तमान अध्यक्ष कृष्णलाल महर्जनं कनादीगु दु । वय्कलं कनादीकथं पुनःनिर्माणया लिपांगु चरणय् थ्यंगु देगः वइगु असोज तकया दुने पूर्णरुपं निर्माण सम्पन्न यायेगु लक्ष्य कयातःगु दु ।

स्थानीयवासीपाखें हे चन्दा संकलन यानाः पुनःनिर्माणा ज्या न्ह्याकूगु देगःया निंतिं थीथी संघसंस्थापाखें नं ग्वाहालि याःगु खः । देगःया पल्लिइ लुँ सीगु बाहेकं पुनःनिर्माणय् जक थ्यंमथ्यं न्यागू करोड तका खर्च जुइगु अनुमान याःगु दु ।

देगः पुनःनिर्माणया निंतिं काठमाडौं भ्याली प्रिजर्भेसन ट्रष्ट (केभीपीसीं) प्राविधिक ग्वाहालि यानाच्वंगु दुसा नेपाल सरकार पुरातत्व विभागलिसें स्थानीय आपालं संघसंस्थां थुकिया नियमित रुपं अनुगमन याना वयाच्वंगु दु ।