फोहोर मुं मवःगुलिं मनपा विरुद्ध सर्वोच्चय् रिट

येँ (नेपालभाषा टाइम्स)÷सिंहदरबार दुनेया फोहोर ममुंगु खँयात कयाः येँ महानगरपालिका विरुद्ध सर्वोच्चय् रिट दर्ता जूगु दु । वातावरण ख्यलय् ज्या याना वयाच्वंम्ह अधिवक्ता पदमबहादुर श्रेष्ठं रिट दर्ता यानादीगु खः ।

सिंहदरबारया फोहोर उठे मयाःगुलिं जनस्वास्थ्यय् नकारात्मक लिच्वः लाःगु धासें येँ महानगरपालिका विरुद्ध आदेश माग यासें रिट दायर याःगु खः । उगु रिटयात कयाः थौं प्रारम्भिक सुनुवाई जुइगु खँ दु । संघीय सरकारं येँ मनपायात ग्वाहालि मयाः धासें मेयर बालेन साहं सिंहदरबारया फोहोर उठे याइगु कम्पनीयात फोहोर उठे मयायेत निर्देशन बिउगु खः । मेयरया निर्देशन लिपा च्यान्हु न्ह्यवंनिसें सिंहदरबारया फोहोर उठे यायेगु ज्या बन्द जुयाच्वंगु दु ।

मेयर साहं सुकुम्बासी चीकेगु सवालय् गृह मन्त्रालय व स्थानीय प्रशासनं थःत ग्वाहालि मयाः धासें भीआईपी लागाय् फोहोर उठे मयायेगु घोषणा याःगु खः ।
थ्वहे झ्वलय् येँ महानगरपालिकां सार्वजनिक जग्गा मिचे यानाः दयेकातःगु अनधिकृत संरचना न्हय्न्हुया दुने चीकेत बिउगु सुचंयात तत्काल कार्यान्वयन मयायेत उच्च अदालत यलं थ्व स्वयां न्ह्यः बिउगु अल्पकालीन अन्तरिम आदेशयात निरन्तरता बिउगु दु ।

म्हिगः न्यायाधीशपिं दुर्गाबहादुर विश्वकर्मा व दिपेन्द्र अधिकारीया इजलासं थ्व स्वयां न्ह्यःया आदेशयात निरन्तरता बिउगु खः । वंगु चैत १७ गते न्यायाधीश धीरबहादुर चन्दया एकल इजलासं उगु रिट निवेदनय् सुनुवाई यासें येँ मनपां जारी याःगु सुचंयात कार्यान्वयन मयायेत अल्पकालीन अन्तरिम आदेश बिउगु खः ।

नेपालभाषा टाइम्स

च्वमिया मेमेगु

• नेवाः हाइकु ख्यः न्हय्‌क्वःगु बुसादँ हना
• महाकवि सिद्धिदासया बुन्हिया लसताय् चिनाखँ व किपा च्वज्या कासा
• एनओएया रजत जयन्ती व न्हूधाः
• सामाजिक संजालं लुइकल स्वंगू दशक न्ह्यः तंगु मूर्ति
• परियत्तिया आधिकारिक वेबसाइट संचालन