
येँ (नेपालभाषा टाइम्स)÷नेपाली कांग्रेस पार्टीं थःपिं गुगुं नं धार्मिक राज्यया पक्षय् मदुगु खँ स्पष्ट याःगु दु । वंगु फागुन ३ व ४ गते सानेपाय् च्वंगु केन्द्रीय समिति बैठकं यदि केन्द्रीय दुजःतय्सं महासमिति बैठकय् सनातन हिन्दू राष्ट्रया माग यानाः पूरक प्रस्ताव हःल धाःसां नं थुगु एजेन्डां आधिकारिकता काये मफइगु खँ कांग्रेसं धाःगु दु ।
म्हिगः यलया गोदावरीइ पत्रकार सम्मेलन यासें प्रचार विभागया प्रमुख मिनबहादुर विश्वकर्मां धयादिल, ‘नेपाली कांग्रेस गुगुं नं एकल विचारया पक्षय् मदु । अथे जुयाः जिमिसं बहुलवादय् आधारित बहुदल धया । एकल धर्मया राज्य, एकल वंशया शासन, एकल जातीय शासन, एकल बिचारया शासन नेपाली कांग्रेसयात स्वीकार्य मदु ।’
पत्रकार सम्मेलनय् प्रवक्ता विश्वकर्मां छुं पासापिंसं हस्ताक्षर यानाः हिन्दू राष्ट्र माः धकाः धाःगु धासें धयादिल, ‘छुं पासापिंसं जिमिसं हिन्दू धर्म माने याना, हिन्दू राष्ट्र माः धयादीगु खः । वय्कःपिनिगु थ्व प्रस्ताव जुइमाः धकाः माग यानादीगु खः । तर कांग्रेसया प्रस्ताव मजुल । महासमितिइ सहलह यायेगु प्रस्ताव हे मजुइधुंकल ।’
वय्कलं कांग्रेस जातीय, क्षेत्रीय, धार्मिक, साम्प्रदायिक पार्टी मखु धासें कांग्रेस राष्ट्रिय पार्टी गुगुं नं धार्मिक राज्यया पक्षय् मवंनिगु खँ नं धयादीगु दु ।
थ्वहे झ्वलय् कांग्रेसया जिल्ला सभापतितय्सं १ नम्बर प्रदेशया नामाकरणयात कयाः महासमितिया एजेण्डा दयेकेत माग याःगु दु । झिंप्यंगू जिल्लाया सभापतितय्सं म्हिगः मंकाः विज्ञप्ति जारी यासें प्रदेशया नांयात कयाः सहलह यायेमाःगु माग याःगु दु । जिल्ला सभापतितय्सं वंगु जेठ १७ गते नं मंकाः विज्ञप्ति पिथनाः नांयात कयाः पुनर्विचार यायेत इनाप याःगु खः ।
LEAVE YOUR COMMENTS